KANDIDATU ESTUDANTE FOUN 324 TUIR ONA TESTE BA FAZE DATOLUK NIAN IHA UNPAZ

KANDIDATU ESTUDANTE FOUN 324 TUIR ONA TESTE BA FAZE DATOLUK NIAN IHA UNPAZ

Dili-Universidade da Paz (UNPAZ) realiza teste ezame ba kandidatu estudante foun atus tolu rua nulu resin haat (324) ne’ebé kompostu husi Fakuldade neen ba tinan akadémiku 2023 ba faze datoluk, iha Kampus Sentra UNPAZ (25/02).

Kandidatu estudante foun FCSH Departamentu Relasaun Internasional, hanesan Membru Naval F-FDTL, Julio dos Santos, hateten ha’u hakarak asesu ba iha Universidade da Paz, tanba primeiru universidade privadu ne’ebé oferese ba iha funsionariu sira ne’ebé atualmente atu eleva ba ida-idak nia kapasidade liu-liu ba iha siensia ninian. Segundu universidade bele fó tempu ka oportunidade atu aprende ba tempu loron ka kalan extensaun, tanba ne’e, mak oportunidade di’ak ba ami funsionariu haree mós ba iha servisu iha loraik ami bele iha tempu ne’ebé di’ak ami bele mai aprende iha universidade da paz.

“Razaun hili unpaz, primeiru iha eskola ka aprendisajen kalan mós iha, segundu tanba universidade fó oportunidade di’ak mai ami, karik ita okupadu servisu ka tempu limitadu atu eskola loron, ita bele eskola kalan, ida ne’e mós parte di’ak mai ami funsionariu sira, wain hira ita iha rai liur ruma mós ita bele prosesu eskola liuhusi online”,tenik Julio.

Nia salienta, departamentu ne’ebé ha’u hili, tanba relasaun internasional parte ida di’ak, hanesan ha’u servisu iha F-FDTL, tanba buat ida motiva ami ba foti iha relasaun internasional ninian, primeiru tanba kada tinan-tinan kria buat ida treinu konjuntu entre nasaun ho nasaun, ezemplu hanesan ami nian sempre treinu ho Australia, Usailand, Japão, nomós seluk tan.

Estudante ne’e, hato’o mensajen ba maluk sira hotu katak, Universidade da Paz fó tempu ka oportunidade di’ak mai ita para bele aproveita, atu eleva ita nia koñesimentu, tanba ne’e mak ha’u husu ba maluk sira ne’ebé mak laiha tempu ruma para atu bele eskola, entaun Universidade da Paz fó tempu mai ita loraik extensaun ninian, tanba ne’e mak husu ba maluk sira bele utiliza tempu livre ne’ebé iha loraik, bele mai eskola ka aprende iha Universidade da Paz ne’ebé fó tempu di’ak mai ita, tanba edukasaun ba ita laiha bataska/senlimite ba ita hotu liuhusi aprende ne’e mak importante ba ita nia futuru.

Iha fatin hanesan, Kandidatu estudante foun FSPeCM Departamentu Enfermagen, Nivia Josefina de Jesus Guterres, reforsa, ha’u kontenti tebes, tanba ha’u hili departamentu enfermagen, atu bele ajuda ema nia vida ka salva ema nia vida, wain hira ema ne’ebé moras ka presiza ita bele atende lalais.

“Eskola enfermagen universidade hotu-hotu iha depertamentu enfermajen, maibe ha’u hakarak hili iha UNPAZ ne’ebé foin loke iha Fakuldade Saúde Públika, liu-liu ba Departamentu Enfermajen, tanba ha’u hakarak aprende iha Universidade da Paz”,dehan Nivia.

Entretantu teste estudante foun ba faze datoluk, kompostu husi estudante fakuldade neen hanesan, Fakuldade Ekonomia ho total (46) ne’ebé kompostu husi Departamentu 4, Departamentu Jestaun estudante (6), Konatabilidade (9), Bankaria (30), Empreendedorismu (1). Fakuldade Direitu ho total estudante (37). Fakuldade CSH ho total Estudante (44) ne’ebé kompostu husi departamentu 4 hanesan Departamentu Relasaun Internasional estudante (20), Polítika Dezenvolvimentu (1), Estudu ba Paz (laiha), Administrasaun Públika (23). FSPeCM ho total estudante (149) ne’ebé kompostu husi Departamentu 7 hanesan Departamentu Jestaun , ADM Polítika Saúde (9), Siensia Nutrisaun (5), Siensia Saúde Ambiental (1), Saúde Reprodutiva (1), Siensia Epidemologia (3), Bositatistika no Sistema Informasaun Saúde (laiha), Siensia Enfermagen (130). Fakuldade Enjeñaria ho total Estudante (43), ne’ebé kompostu husi Departamentu 3, hanesan Departamentu Arkitetura estudante (6), Enjeñaria Indústria (4), Sivil (33). Fakuldade Tek. Agrikola ho total estudante (5), ne’ebé kompostu husi Departamentu 2, hanesan Departamentu Jestaun Alimentar estudante (laiha), Konservasaun Rekursu Naturais (5). Dadus Rejistrasaun Estudante Foun Etapa 1 + 2 + 3 ba tinan akadémiku 2023 estudante Foun hamutuk iha Kampus Sentral Dili, 3299.