JCI-TL HO APDC PARTILLA ESPERIENSIA BA ESTUDANTE SIRA IHA UNPAZ

JCI-TL HO APDC PARTILLA ESPERIENSIA BA ESTUDANTE SIRA IHA UNPAZ

Dili-Universidade da Paz (UNPAZ) Liuhusi Fakuldade Ekonomia servisu hamutuk ho Junior Chamber Internasional Timor-leste (JCI-TL) nomós Asia Pacific Development Council (APDC) Hodi realiza seminar ho tema “Youth Development in Leadership cooperation and Entrepreneurship Development” Iha Aula Prof. Dr. Lucas da Costa (05/10/24).

Reprezenta Dekanu fakuldade ekonomia, Sr. Paulo Victor, Lic.Eco., M.Kont hato’o agradese wa’in ba JCI-TL nomós APDC nomós bainaka espesial sira ne’ebé mak mai husi rai liur bele mai fahe sira nia esperensia ba iha estudante sira iha UNPAZ liu-liu fakuldade ekonomia, fakuldade Agrikola, fakuldade saúde Públika e Ciensia Medicas no liu-liu fakuldade ekonomia departamentu emprendedorizmu.

“Estudante sira tenki uza oportunidade sira ne’e halo didi'ak, hodi nune’e bele hetan esperensia direta husi ita nia bainaka espesial sira nomós husi ita nia organizasaun JCI-TL ne’ebé lidera husi prezindete nomós ita nia Sr. Janio Tilman nomós maluk timor oan sira ne’ebé hamahan an iha JCI-TL ho sira-nia inisiativa bele lori programa ne’e mai hatutan iha UNPAZ liu-liu ba fakuldade tolu”, dehan Nia.

Prezidente Nasional JCI-TL Ms. Maria Terezinha de Jesus hateten, kada tinan ami iha lideransa ne’ebé lidera mai ho nia programa sira ne’ebé mak iha JCI-TL sempre halo programa ne’ebé mak ami iha pilares haat iha organizasaun ne’e nian rasik hanesan ohin ita haree iha Business & Entrepreneurship, International Cooperation, Individual Development, Community Impact.

“Pilares haat ne’ebé mak ami iha organizasaun nian rasik, ami hakarak atu halo interasaun ho estudante universitariu sira hodi nune’e bele ajuda ka fó impaktu ne’ebé di'ak liu ba iha joven sira liu-liu ba iha joven universitariu sira ne’ebé mak durante ne’e sira hetan teoria, maibé sira seidauk hetan iha área pratika nian, entaun ho intensaun sira ne’e ami hakarak halo kooperasaun ho universidade sira, nune’e bele lori bainaka sira ne’ebé husi rai liur liu-liu ne’ebé hamahan iha bisnis ka iha área Emprendedorizmu nian bele mai fahe sira-nia esperensia ba iha joven sira liu-liu ba iha estudante universitariu sira iha area emprendedorizmu nian”, tenik.

Nia dehan, hanesan tema ne’ebé mak ami lori ba loron ohin nian mak “Youth Development in Leadership Cooperation and Entrepreneurship Development” ho inisiativa sira ne’e hotu hakarak atu ajuda malu ho joven sira ne’ebé mak iha hanoin bele sai hanesan lideransa aumesmu mós sira labele sai dependente, maibé sira mós tenki independente liu husi lideransa nian sira bele aprende oinsa sira bele kapasita sira-nia an di’ak liu tan iha área emprendedorizmu iha futuru.

Iha sorin Seluk Reprezenta Brief Remark by Counselor APDC Sr. Fahimul Islam, hateten ami apresia tebes ba universidade bele hetan espasu ba iha JCI-TL (Junior Chamber International Timor-Leste), partikularmente ba fakuldade ekonomia, JCI Timor-Leste ne’e hamutuk ho APDC (Asia Pacific Development Council) ne’ebé husi Banglades, Cambodia, Japaun nomós India bele hetan oportunidade halo interasaun ho estudante sira husi fakuldade ekonomia.

“Ida ne’e oportunidade di'ak ida ohin ita bele servisu hamutuk atu bele ajuda foin sae sira ne’e bele hadia moris ba iha futuru di'ak liu tan, no fó oportunidade ba sira atu pratika lideransa iha plataforme organizasaun ida ne’e ho JCI-TL, hanoin kooperasaun ne’ebé ohin ita asina hamutuk ida ne’e mós bele fó hela espasu ba ita atu kontinua servisu hamutuk entre JCI Timor-Leste nomós Universidade da Paz liu-liu fakuldade Ekonomia ba atividade sira tuir mai iha futuru”, Nia Subliña.