FTA-UNPAZ DISTRIBUI TAN TITULU AKADEMIKU BA FINALISTA NAIN 66

FTA-UNPAZ DISTRIBUI TAN TITULU AKADEMIKU BA FINALISTA NAIN 66

Dili-Universidade da Paz (UNPAZ) Liuhusi Fakuldade Teknologia Agrikola, realiza Serimónia Judisium ba dala XVII, Tinan Akadémiku 2023, hodi distribui títulu Akadémiku ba finalista na'in neen nulu resin neen (66) ne'ebé kompostu husi Departamentu Teknologia Jestaun Alimentar No Departamentu Konservasaun Rekursu Naturais, ho Tema "Promove Diversifikasaun Produtu Agrikola Liu Husi Aplikasaun Teknologia Konservasaun Rekursu Naturais",iha Salaun José Kasimiru (18/11).

Magnífiku Reitór Universidade da Paz, Dr. Adolmando Soares Amaral, Lic. Eco.,MM. hateten ita halo buat ruma maka, ita la infreta buat ruma, ne’e la’os moris, ne’e ema dehan ita mehi, tanba ne’e atu dehan de’it katak moris ne’e nunka sente susar ba objetivu ida, ne’e la’os moris, ne’e mehi de’it, maibe ita boot na’in hira ne’ebé ohin tur iha ne’e ho objetivu ida de’it, katak ita boot sira enfrenta tiha dezafiu lubuk ida, maka ita boot sira bele mai tuir iha ne’e, dezafiun ne’ebé ita boot sira hasoru, ne’e la’os mehi, ohin realidade ita boot sira mai tur iha ne’e, tanba ne’e ohin imi tur iha ne’e, tanba inan aman sira tuir iha kotuk ne’e nia sakrifisiu.

Nia dehan, hanesan muzika ne’ebé hananu katak, hanesan oan nunka selu inan aman nia kolen, tanba ne’e saida mak imi bele halo ba sira atu hamnasa no kontente, maka agora sira sei tur iha ne’e, imi halo kedas, labele hanoin depois de sira la hamutuk ho imi, maka imi foin hanoin atu halo sira kontente ho buat oi-oin, tanba ne’e sira sei iha di’ak liu aproveita oportunidade ne’ebé sira sei iha, sira la reklama ba imi, di’ak liu halo sira kontente no hamnasa iha tempu sira tuir mai, ida ne’e mak ita bele halo nu’udar agradesimentu ba sira. Ita nia inan aman sira la husu ita atu selu sira -nia kolen, maibe ita nia inan aman prsiza, iha tempu ne’ebé sira bolu, ita iha sira-nia sorin.

Reitór Husu ba judisista sira, atu labele moe ba kondisõen inan aman sira-nia agora dadauk ne’e, maibe moe ba winhira imi susesu tiha, sei nafatin halo susar inan aman, imi sira agrikultura ne’e, imi kuandu kuda hare, dut mós moris hamutuk ho hare ne’e, maibe imi kuda dut, hare nunka moris hamutuk ho dut ne’e, winhira imi susesu halo buat di’ak, maka buat at mós sei tenta imi, maibe imi susesu, imi halo buat at, maka buat di’ak nunka akompaña imi, tanba ne’e imi tenki halo di’ak de’it, maske hasoru baut at iha imi nia moris.

“Hanesan finalsita, labele hanoin atu servisu iha kompaña boot sira no servisu iha governu, tanba buat ida atu sai lideransa ne’e hakerek tiha ona iha ita nia liman laran, hakarkak ka loi ita, tenki ba ida ne’ebá, maibe tenki halo buat ruma, hanesan ema garikultura haree ba populasaun ne’ebé maioria ninia vida agrikultura ho área produsaun ho produtividade iha seitor agrikultura ne’ebé mak kiik, saida maka ita tenki halo, sa tan imi aprende siensia iha área teknologia agrikultura, imi la’os ona atu kuda tomati no modo ka sira seluk tan, maibe oinsa bele trasforma husi hudi abut ne’e sai ba mermelada, ai-nanas sai ba tua, ida ne’e mak ita boot sira-nia estudu ne’e, agrikultura ida imi aprende durante ne’e, maka agrikultura ida ba prosesamentu no konservasaun rekursu naturais, ida ne’e mak imi tenki halo ba povu no rai ida ne’e”,dehan Reitór.

Lider masimu ne’e akresenta, Fó valor ne’e bele, julga ne’e mak labele, fiar an ne’e importante, mais hatene an ne’e importante liu, ne’e atu hateten katak, ema seluk bele sala, mais presiza hatene katak, ita mós atu los hela de’it, husu ba imi na’in hira, hanesan imi nia maun, enkora nafatin imi, halo buat ruma ba povu no rai ida ne’e, inan aman sira investe ona sira hakarak, ita bele halo buat ruma ba rai ne’e. Tanba ne’e agradese ba inan aman sira-nia fiar, UNPAZ la’os ami, UNPAZ la’os sira, UNPAZ ita hotu, tanba ne’e, UNPAZ sosiedade nian, ohin ita hala’o serimónoia ida ne’e, tanba fiar inan aman nian no sosiedade nian.

Iha fatin hanesan, Dekanu FTA, Eng. Jonio dos Santus, M. Agr. katak iha biban ida ne’e, permite ha’u atu hato’o liafuan tolu mak importante liu iha serimónia solene ida ne’e, primeiru mak agradesimentu, segundu maka lia menon no ida ikus husu perdaun, liafuan tolu ne’e mak sai intervensaun iha momentu ida ne’e, ami to’os na’in ne’e kuandu ko’alia barak, ai-oan sira mate hotu, agrikultura halo mak barak liu, ko’alia ituan de’it, ne’e para labele fó terus ba ai-oan sira, tanba ne’e finalista sira tenki banati tuir ida ne’e.

“Agradese ba inan aman sira-nia esforsu, dedikasaun no responsabilidade tomak, hodi fó biban ba oan sira, hodi kontinua estudu iha UNPAZ liu-liu fakuldade teknologia agrikola, ohin sira bele finaliza ona sia-nia estudu, agradese mós ba kondutor sira ne’ebé durante ne’e, fasilita estudante sira, agdese mós ba manorin na’in sira hotu iha UNPAZ nomós funsionariu ne’ebé hamos ambiente UNPAZ halo mós no seguransa sira ne’ebé asegura hela UNPAZ”,dehan Dekanu.

Deknau husu ba judisista 66 , favor haree no reflete ba tema ne’ebé iha, imi remata iha ne’e, atu rekopera fila fali inan aman sira-nia esforsu no kosarben durante tinan barak nia laran, ida ne’e la’os atu hatudu katak, imi tenki ba servisu iha instituisaun governu ka ba iha rai liur lae, labele hanoin ba ida ne’e, se imi haree de’it, tema ne’ebé iha, buat hotu iha imi nia liman laran, dezenvolve ida ne’e, atu bele kria servisu ba imi nia an no servisu ba maluk sira seluk, servisu la’os ema mak fó mai ita, maibe ita mak halo ba ita nia an rasik no halo ba ema seluk.

Sorin seluk, Reprezenta inan aman husi judisista sira hotu, Sr. Mateus de araújo, agardese no urgullu ba manorin na’in sira hotu iha UNPAZ, ne’ebé durante kontribui ona matenek ba ami nia oan sira, ohin loron sira bele tur iha fatin ida ne’e, tanba ne’e ami kontente no orgullu ba manorin na’in sira hotu iha UNPAZ.

Reprezenta judisista sira hotu, Monalisa Bareto, agradese ba fundador no estrutura universidade, tanba bele fó oportunidade ba timor oan hotu, bele halibur hamutuk no aprende hamutuk, hodi esplora siensia no teknologia atu sai hanesan knua intelektual, kada tinan sempre produs finalista rihun ba rihun, tanba ne’e, agradse ba manorin na’in sira ne’ebé durante oferese matenek ba ami, hodi bele aumenta tan titulu foun, agradese mós ba inan aman sira-nia dedikasaun no tula liman masimu husi ita boot sira, ohin ami bele tur iha fatin ida ne’e.

Entretantu iha Serimónia Judisium Fakuldade Teknologia Agrikola, partisipa husi, Magnífiku Reitór Universidade da Paz, Dr. Adolmando Soares Amaral, Lic. Eco.,MM. Prezidente FNM ho Estrutura, Estrutura Universidade ne'ebé Kompostu husi, Dekanu Fakuldade Neen, Xefe Departamentu sira, Vise Reitóres sira, Pro-Reitor sira, Diretor/a Unidade sira, Dosente Funsionariu, Konvidaus Inan Aman Sira, Finalista sira inklui Akadémiku iha Universidade da Paz.