FSP-UNPAZ REALIZA TREINAMENTU BA DOSENTE SIRA

FSP-UNPAZ REALIZA TREINAMENTU BA DOSENTE SIRA

Dili-Universidade da Paz (UNPAZ) liuhusi Fakuldade Saúde Públika hamutuk ho BiPH kontinua realiza atividade treinamentu Epi-info ba dosente sira, iha Aula Prof.Dr. Lucas da Costa (18/01).

Vice Reitor Asuntu Estudantil no Antigus Alunus, Sra. Marilia Juvi Gonsalves, Lic SP.,M. Kes, nu’udar dosente FSP, hateten treinamentu ida ne’e iha benefisiu tebes, tanba husi programa BiPH ne’ebé agora ami tuir ne’e, iha materia ne’ebé mak durante ami hetan, antes ami tuir ona iha nivel lisensiatura, maibe la klaru, tanba iha momentu ne’eba iha teoria de’it, kona-ba pratika hansan agora dadauk ami utiliza ne’e seidauk.

“Agora dadauk ne’e bele fasilita ona ami liuhusi programa ida ne’e, tanba liuhusi programa ida ne’e, ami bele analiza liuliu iha peskiza nian, tanba ne’e, importante tebes iha tempu uluk, ita utiliza manual, amibe agora dadauk ne’e, ita sei la utiliza ona ba programa manual, maibe ita utiliza ona programa ida ne’ebé tama ona iha sistema”,tenik Nia.

Sorin seluk, Dosente Honorio Pereira Vicente, Lic. SP.,M.Kes, hatutan, hanesan dosente importante tebes formasaun ba aplikasaun ida ne’e ajuda tebes ami nomós ami nia estudante sira, oinsa ami bele utiliza esperiensia sira ne’e hodi bele kapasita fila fali estudante nomós ami bele halo formatu, enter data sira inklui analiza dadus liuhusi aplikasaun ne’e.

“Husi aplikasaun ne’e, nu’udar benefisiu bo’ot ida, oinsa hasa’e ema nia kapasidade kona-ba teknologia la’os ba oin de’it maibe ba futuru”,dehan Dosente Honorio.