FSPeCM ORGANIZA SERIMONIA TOMADA DE POSSE SENADU ESTUDANTIL FOUN PERIODU 2024-2025

FSPeCM ORGANIZA SERIMÓNIA TOMADA DE POSSE SENADU ESTUDANTIL FOUN PERÍODU 2024-2025

Dili-Universidade da Paz (UNPAZ) liuhusi estrutura Senadu Estudantil Fakuldade Saude Publika e Ciensia Medika , organiza Serimónia Tomada de posse ba estrutura Senadu Estudantil foun Períodu 2024-2025, iha Salaun Multi-funsaun FSPeCM (12/11/24).

Iha serimónia tomada de posse ne’e, Magnífiku Reitór UNPAZ, Dr. Adolmando Soares Amaral, Lic. Eco.,MM. hato’o parabens ba estrutura senadu sesante ho nia estrutura ne’ebé mak halo ona buat lubuk ida no apoiu aktividades ne’ebé ligadu ho aktividade extra-kurikular iha FSPeCM, nomós ba senada eleitu parabens bele kontinua halo servisu tuir programa ne’ebé ohin ita bo’ot sira aprezenta ona, senadu estudante ne’e imi presiza haree no fokus liu ba aktividade extra-kurikular lalika ba halo fali aktividades sira hanesan ema aktivista sira, no imi tenki halo asosiasaun labele uza fali senada ne’e ba halo fali aktividades seluk, husu ba senada atu bele halo asosiasaun kada departamentu. Tanba asosiasaun estudante kada departamentu sira mak hatene liu problema iha departamentu sira, depois ida ne’e mak sira apresenta mai iha senada estudantil mak hafoin imi halo planu iha ne’eba depois lori ba iha konselu representativu estudante sira aprova tiha depois mak imi implementa.

Mg Reitor hateten, aktividade senadu estudantil menus ne’e la’os imi nia sala talvez Reitor, Dekanu, Vice Dekanu sira ne’ebé responsabliza ba aktividade mak ladun esplika klaru matadalan ne’ebé hakerek ona kona-ba aktividade estudante sira nian, maibé ha’u hanoin tinan lima ita aprende no tinan lima ba oin ita sei aprende di’ak liu tan ne’ebé husu ba asosiasaun kada departamentu, senadu estudantil, konsellu representativu estudante fokus ba programa sira no ba area peskiza sira depois iha dadus ne’ebé natoon mak bele halo intervensaun, tanba bainhira imi hare de’it asaun estadu ka governu nian depois mak imi dehan reprensenta povu maibé imi seidauk toba hamutuk ho povu no seidauk senti saida mak povu senti, depois imi hanesan de’it akademiku iha universidade imi hakarak halo imi nia an hanesan aktivista imi ko’alia iha publiku representa povu, bainhira ita hakarak ko’alia interese povu nian tenki ba moris hamutuk ho povu senti saida mak povu senti komprende sira mak foin mai ko’alia representa povu tanba baze dadus iha, tanba ema akademiku ne’e ko’alia bazeia ba dadus no kritika fo kedas solusaun, hanesan estudante ne’ebé kreativu tenki ko’alia bazeia ba dadus. Tanba ne’e enkoraza peskiza hahu kedas husi departamentu mai iha fakuldade depois to’o iha universidade, peskiza sira ne’ebé ita halo ne’e atu tulun guvernu no estadu atu solusiona problema ne’ebé povu hasoru iha rai ida ne’e.

Iha fatin hanesan Dekanu FSPeCM, Sr. Cipriano Do Rosario Pacheco, Amg, Lic.,SP.M.Kes , hateten senadu estudantil hanesan asembleia ka orgaun ezekutivu ida ne’ebé nia reprezenta estudante sira hotu iha nivel akademíku ninian, tanba ne’e hanesan lia menon ida husi dekanu atu fo hanoin ba ita bo’ot sira tenki iha ativamente atu halo aktividade sira ne’ebé iha no hakbesik an ba estrutura senadu fakuldade, tanba iha ita ninia Vice dekanu assuntu estudantil atu nune’e bele aprezenta ita bo’ot sira nia planu iha nivel fakuldade nune’e ita tetu hamutuk hodi ezekuta aktividade sira ne’e. Hanesan dekanu nafatin nakloke ba iha orgaun ida ne’e tanba fakuldade mesak,dosente mesak sei la halo buat ida maibé liu husi ita bo’ot sira hanesan liman ain no kolega sira seluk ita bele asegura ita nia fakuldade nomós kontribui ba universidade hodi kontribui mos ba ita nia nasaun.

No atu enkoraza ita bo’ot sira katak agora ita mai ho mandatu Magnífiku Reitór ne’ebe dehan melloramentu peskiza, tanba ne’e mak aktividade balu ita mos tenki halai ba mai maibé tenki tuir ninia kuridor, maske ita bo’ot sira orgaun ezekutivu maibé sei iha hela universidade ninian entaun komunikasaun ne’e importante no ita la limita ita bo’ot sira atu expresa ita bo’ot sira nia direitu, maibé ita bo’ot sira tenki hare ba iha ita bo’ot sira nia status hanesan estudante iha universidade tanba ne’e la’o tuir kuridor ne’ebé iha. Entaun karik iha failansu ruma hakbesik an mai iha estrutura atu nune’e ita bele rezolve hamutuk tanba ita bo’ot sira iha hela kuridor no regras universidade nian.

Dekanu mós hato’o parabens ba iha servisu ne’ebé mak senadu sesante ho nia estrutura sira halo ona buat lubuk ida, no buat ne’ebé mak senadu sesante la konsege realiza hare ba esperiensia ekipa husi senadu sesante nian atu sai hanesan lisaun ne’ebe prinsipal ba iha senada eleitu ho nia estrutura sira atu bele kompleta ba iha aktividade sira ne’ebé mak la konsege halo iha mandatu tinan ida nia laran. Parabens ba iha senada eleitu ho nia estrutura sira husi imi lubun wa’ín, ne’ebé mak ita hatene katak ita ninia fakuldade ema barak tebes maibé ita bo’ot sira mak eleitu ne’e fi’ar ida ne’ebé mak ita bo’ot sira assume tenki ho responsablidade.

Sorin seluk Senada estudantil eleitu Fernanda Martins da Cruz, hateten katak papel senada nian mak papel fundamental atu reprezenta kolega estudante sira no promove sira nia mentalidade no interese iha komunidade akdemíku, no senada hanesan orgaun reprezentativu ne’ebé mak tutela iha Vice Decanu assuntu estudantil nia okos, oinsa mak atu rona no lori preokupasaun no aspirasaun kolega estudante sira nian hodi hato’o ba iha fakuldade liu-liu preokupasaun sira ne’ebé afeta ba iha prosesu aprendisagem. Senada importante iha instituisaun ida la’os deit reprezenta interese estudante nian maibé kontribui mos ba dezenvolvimentu komunidade akademíka nian ida ne’ebe ativu no kompremitidu liu husi aktividade sira no ajuda kria ambiente ne’ebé fasilita estudante sira aprende ho konsiensia no partisipa iha aktividade sira ne’e.

Entretantu iha seremonia ne’e, partisipa maximu husi Magnífiku Reitór UNPAZ, Dr. Adolmando Soares Amaral, Lic. Eco.,MM. Vise Reitora Asuntu Estudantil, Sra. Felisbela A. O de Oliveira, Lic. SP., M.SP. Dekanu Fakuldade Saude Publika e Ciensia Medika , Sr. Cipriano Do Rosario Pacheco, Amg, Lic.,SP.M.Kes , ho estrutura fakuldade, Dosente, Funsionariu, Senadu estudantil husi fakuldade neen inklui sivitas akadémiku husi fakuldade saude e Ciensia Medika, Universidade da Paz.