FSPeCM ORGANIZA SERIMONIA JUDISIUM BA FINALISTA 398 IHA UNPAZ

FSPeCM ORGANIZA SERIMÓNIA JUDISIUM BA FINALISTA 398 IHA UNPAZ

Dili-Universidade da Paz (UNPAZ) liuhusi Fakuldade Saúde Públika e Ciénsia Medika, organiza serimónia Judisium ba finalista atus tolu sianulu resin ualu (398) Tinan Akadémiku 2024, ne’ebé kompostu husi departamentu Administrasaun Jestaun e Polítika ba Saúde. Siensia Nutrisaun. Siensia Saúde Ambiental. Saúde Reprodutuva. Siensia Epidemologia. No Biostatistika e Sistema Informasaun ba Saúde. ho tema “Produs Graduadu Ne’ebé Profesional Iha Área Saúde No Iha Komitmentu Dezenvolve Nasaun”Iha Salaun José Kasimiru (14/12/24).

Prezidente Konsellu Administrasaun FNM. Eng. José Menezes, M.FoodTech, hato’o parabens ba judisista sira hotu ne’ebé susesu iha ida-idak nia área, maibe imi nia susesu ne’e imi nian duni, tanba ne’e labele hanoin dehan imi deve ema seluk, tanba imi hala’o imi nia responsabilidade no ami dosente hala’o nia responsabilidade nomós inan aman sira mós hala'o nia’responsabilidade maka imi hotu nia susesu.

“Liafuan motivasaun ne’ebé ko’alia atu motiva imi no loke imi nia hanoin, maibe desizaun ba imi atu sai saida iha futuru ne’e iha imi nia liman rasik, maibe importante maka imi hahu ona buat balu iha tempu liubá, agora imi tuir ona judisium imi nia responsabilidade atu kontribui ba matenek no abilidade ne’ebé imi hetan ba iha komunidade no sosiedade, tanba Timor-Leste presiza ita hotu nia responsabilidade”,dehan Prezidente FNM.

Iha fatin hanesan, Vise Reitór Asuntu Adm. G. Finansas, ne’ebé reprezenta Magnífiku Reitór, esklarese ohin ita hala’o serimónia ne’ebé signifikadu nomeante tebes ba judisista sira hotu, nu’udar momentu istóriku tebes judidista sira-nia esforsu tomak bele finaliza estudu iha FSPeCM-UNPAZ. Tanba ne’e fila ba iha sosiedade tenki hatudu imi nia profesionalizmu nu’udar ema saúde iha komunidade, tanba imi mak sai ajente mudansa ba servisu hadia kulidade moris nian.

“Imi nia viajen la’os buat fasil, maibe imi nia esforsu no estudu mak rezultadu husi servisu maka’as durante tinan haat nia laran, maske hasoru dezafiun no obstaklu barak, maibe imi konsge ultrapasa situasaun hotu hodi to’o iha momentu ida ne’e, tanba ne’e, agradese mós ba inan aman no familia sira hotu ne’e fó konfiansa ba UNPAZ hodi haruka oan sira mai apriende siensia no teknologia iha UNPAZ”,tenik Vise Reitór Adm G. Finansas.

Sorin seluk, Dekanu FSPeCM, Sr. Cipriano do R. Pacheco, AMG, Lic. SP.,M.Kes. hateten inan aman no judisista sira hotu, susesu ne’ebé ita bo’ot sira sente no ami sente, buat ida la fasil ba ema seluk atu ultra pasa, maibe ita bo’ot sira konsege ultra pasa iha situsaun hotu hodi to’o iha momentu ida ne’e nia finalidade, durante tinan haat ita bo’ot sira esforsu maka’as hodi hatudu rezultadu ne’ebé ema hotu asiste. Tanba ne’e merese duni parabens ba ita bo’ot sira hotu nia susesu ida ne’e.

“Papel inan aman mak sai ajente ba iha asaun edukasaun nomós ita bo’ot sira mak sai hanesan heroi ba asaun edukasaun nian, ne’ebé ita bo’ot sira iha komitmentu no protindaun hodi haruka oan sira kontinua estudu hanesan realiddae ne’ebé ita hotu asiste, enkuantu husu ba judisista sira koidadu ba tempu foun ne’ebé imi sei hakat ba ho imi nia maturidade hanesan ema akadémiku”,katak Dekanu FSPeCM.

Aliende ne’e reprejenta Inan Aman Judisista sira hotu, Sra. Maria Exposto, hato’o agradese no obrigadu wa’in ba manorin na’in sira hotu iha UNPAZ liu-liu FSPeCM, ne’ebé durante ne’e fahe ita bo’ot sira-nia matenek, sakrifisiu no pasiensia, ohin loron ami nia oan sira bele to’o iha nia finalidade. Tanba ne’e agradese mós ba estrutura Universidade da Paz, ami laiha buat ida atu oferese ba ita bo’ot sira, maibe ami nafatin orasaun akompaña ita bo’ot sira atu eduka nafatin sira ne’ebé sei iha hela prosesu nia laran.

Reprejenta judisista sira mós hato'o agradese ba líderansa UNPAZ liuliu iha situasaun defisil nia laran, maibe konsege ho aten brani nafatin hamrik metin iha situasaun hotu, nune’e ami mós hetan espasu naton hodi apriende siénsia no Teknologia iha UNPAZ. Inan aman no familia sira hotu imi nia sakrifisiu sira ne’ebé fó mai ami labele sura imi nia memoria ne’ebé evolve, tanba imi lahatene saida mak hamlaha hamrok no kolen tan imi hakarak oan ami bele susesu, ohin loron to’o duni nia finalidade ita asiste susesu ida ne’e.

Entretantu iha serimómia Judisium FSPeCM ne’e, partisipa husi Prezidente Konsellu Administrasaun FNM. Eng. José Menezes, M.FoodTech, Membru Governu balun husi Ministeriu Saúde. Bainaka husi Universitas Indonesia. Estrtura Universidade ne’ebé kompostu husi Vise Reitores sira. Dekanu Fakuldade 7 ho Estrutura Fakuldade nian. Pro-reitores sira. Diretor ho Xefe Unidade sira. Dosente, Funsionariu, Inan Aman no Familia Judisista sira inklui Sivitas akadémiku Universidade da Paz.