FSPCM-UNPAZ NIA ESTUDANTE ESTENSIA NA\'IN 50 SEI HALA\'O ATIVIDADE PAK I IHA LIQUISA

FSPCM-UNPAZ NIA ESTUDANTE ESTENSIA NA'IN 50 SEI HALA'O ATIVIDADE PAK I IHA LIQUISA

Dili-Universidade da Paz (UNPAZ) Liuhusi Fakuldade Saúde Públika e Siénsia Medica, nia estudante estensia semester V na'in lima nulu (50) ne'ebé kompostu husi departamentu neen, sei hala'o atividade Prátika Aprendizajen Kampu (PAK) I durante semana rua iha Aldeia Mau-luto Suku Mota-Ulun Postu Administrativu Bazartete Munisípiu Liquisa (23/04).

Xefe Suku Mota-Ulun, Sr. Francisco Soares, agradese ba estduante UNPAZ liu-liu fakuldade saúde públika ne’ebé ho laran kma’an, hodi hakat mai iha ami komunidade nia leet, liu-liu iha Suku Mota-Ulun, hodi hala’o atividade durante semana rua iha fatin ida ne’e, liu-liu identifika dadus kona-ba moras ne’ebé mak akontese iha komunidade ida ne’e nian.

“Ita bo’ot sira mai iha suku ida ne’e, ami konsidera ita bo’ot sira sai hanesan ami nia komunidade, tanba mai ona iha ami nia suku no aldeia, ho ida ne’e husu ba ita bo’ot sira sé buat ruma akontese iha ne’e, hato’o mai ami inan aman iha suku ida ne’e, ami autoridade prontu atu resonsavel no koidadu ita bo’ot sira durante iha ne’e”,dehan Xefe Suku Mota-Ulun.

Iha fatin hanesan, Dekanu FSPCM, Sr. Cipriano do Rosario Pacheco, AMG, Lic, SP.,M.,Kes, hateten iha ensinu superior ita hotu hatene katak, buat tolu importante mak hanesan prosesu aprendizajen, peskiza no servisu komunidade, programa ida ne'e mós hola parte ba kurikulum nian, ne'ebé kada tinan ita sempre halo, molok estudante sira atu termina sira-nia estudu.

Nia dehan, estudante sira ita hili Liquisa, tanba antes ne'e iha ona dadus balun ne'ebé foti ona sai hanesan baze legal ida, ho ida ne'e mak ita lori estudante sira mai atu identifika nafatin moras sira ne'ebé mak iha, atu bele servisu hamutuk ho autoridade no komunidade oinsá atu bele millora liu tan kona-ba saúde ligadu ho prátika moris saudavel iha komunidade.

“Atividade ida ne'e mak oinsá, atu hetan esperiénsia kona-ba realidade moris, liu-liu ligadu ho Saúde nian, no aplika siensia ne'ebé apriende iha aula durante ne'e, tanba ne’e, agradese ba mai xefe Suku ne'ebé ho laran luak, hodi simu ami nia estudante sira mai hala'o Pratika Aprendizajen kampu iha fatin ida ne'e, ho ida ne’e, estudante sira aproveita oportunidade ida ne’e ho didi’ak”,dehan dekanu.

Entretantu iha atividade Pak I ne’e, Dekanu FSPCM, Sr. Cipriano do Rosario Pacheco, AMG, Lic, SP.,M.,Kes, entrega direta estudante sira ba Xefe Suku Mota-Ulun, Sr. Francisco Soares, no akompaña husi Vise Dekanu Asuntu Estudantil FSPeCM, Sr. Santiago Jorge Pereira, Lic, SP.,MPH no Dosente Orientadór Sr, Elias Pereira Moniz, SKM,Esp,Ed.AMB. no estrutura Suku Mota-Ulun inklui Estudante sira.