FOUNDER GLOBAL HEALTH FOCUS FASILITA TREINAMENTU BA DOSENTES SIRA IHA UNPAZ

FOUNDER GLOBAL HEALTH FOCUS FASILITA TREINAMENTU BA DOSENTES SIRA IHA UNPAZ

Dili-Universidade da Paz (UNPAZ) nia dosente sira partisipa iha treinamentu Tema:” GHF ACHIEVING UNIVERSITY EXCELLENCE THROUGH RESEARCH” ne’ebé fasilita husi Prof. Don Eliseo Lucero-Prisno III, BSc (Hons), MD, PhD, MPH, MSc, FRSPH, PHEA. Founder Global Health Focus) no dr. Adriana Viola Miranda, MD (Regional Country Director of Asia in Global Health Focus) bazeia ba nota kooperasaun ne’ebé selebra husi parte rua horseik, iha Aula Prof. Dr. Lucas da Costa (09/08).

Dekanu FSPeCM, Sr. Cipriano do Rosario Pacheco, AMG.,Lic. SP.,M. Kes. esplika treinamentu ida ne’e hodi responde ba ita nia kooperasaun ne’ebé horseik husi parte rua selebra hamutuk, tanba ne’e formasaun ida ne’e, hanesan asaun konkretu ida ne’ebé hodi responde ba iha kooperasaun ne’ebé husi parte rua servisu hamutuk, tanba ne’e treinamentu ida ohin fokus liu ba iha dosente sira hodi haree liu ba, oinsa peskiza, hakerek jurnal ho kualidade.

Nia dehan treinamentu ida ohin ne’e importante no signifikante tebes, tanba ita nia treinadór ne’e rasik hanesan fundadór Global Health Focus (ghf) ne’ebé nia esperiensia lubuk ida, ho ida ne’e treinamentu ida ohin ne’e motiva tebes dosente sira, oinsa bele kreativu liu tán, la’os hanorin de’it, maibe tenki hala’o mós atividade sira seluk hanesan peskiza hakerek jurnal no halo públikasaun, nune’e bele asegura sustentabilidade ba iha universidade ida ne’e.

“Depois de treinamentu ida ohin ne’e, lisaun ne’ebé mak ita foti katak, atu garante no asegura sustentabilidade universidade, ita la’os atu defende de’it ba iha fundus estudante sira nian mai husi inan aman kada semester, maibe liuhusi atividade kreativu sira hanesan peskiza públikasaun, ita bele asegura sustentabilidade universidade ho fundus oi-oin ba universidade mós bele jere, tantu ba iha nivel universidade nomós fakuldade”,tenik Dekanu FSPeCM.

Dekanu ne’e salienta, treinamentu ida ne’e hanesan komitmentu ida ne’ebé ita selebra ona iha Mou no MoA, tanba ne’e hanesan atividade ba dahluk, maibe asaun ida ne’e ita sei nafatin kontinua, tanba prof ne’e rasik prontu atu suporta UNPAZ, prof ne’e rasik mós iha jurnal ne’ebé kualidade ho folin ne’ebé as tebes, no nia prontu oferese mai iha universidade ida ne’e ho gratuita, tanba ne’e ita tenki aproveita oportunidade ida ne’e, atu esforsu liu tán, nune’e lori universidade liu-liu fakuldade ida ne’e ba iha mundu.

Fontes ne’e esklarese liu tan, Treinamentu ida ne’e ita fahe ba rua, horseik ita seminar ba dosente nomós estudante sira hotu, ohin treinamentu ba dosente sira no aban sei kontinua ba iha estudante sira, oinsa bele mellora di’ak liu estudante sira-nia hanoin, la’os sira atu estuda de’it maibe sira mós durante prosesu apendisajen sira mós prontu ona bele hala’o peskiza nomós halo kompetativu ho universidade sira seluk no nasaun seluk iha mundu.

Entretantu treinamentu ne’e fasilita husi, Prof. Don Eliseo Lucero-Prisno III, BSc (Hons), MD, PhD, MPH, MSc, FRSPH, PHEA. Founder Global Health Focus) no dr. Adriana Viola Miranda, MD (Regional Country Director of Asia in Global Health Focus) no partisipa husi, Vise Reitor Asuntu Akadémiku, Sr. Joaninho Xavier Hei, Lic. CSH.,M. Ed. Dekanu FSPeCM, Sr. Cipriano do Rosario Pacheco, AMG.,Lic. SP.,M. Kes. ho estrtura nomós dosente sira.