FCSH ORGANIZA SERIMÓNIA TOMADA DE POSSE SENADU ESTUDANTIL FOUN PERÍODU 2024-2025
Dili-Universidade da Paz (UNPAZ) liuhusi Fakuldade Ciensia Sosiais Humana,organiza serimónia tomada de posse ba senadu estudantil foun períodu 2024-2025, iha salaun José Casimeru (25/11/24).
Iha serimónia tomada de posse senadu estudantil fakuldade Ciensia Sosiais Humana, Vice Reitora Asuntu estudantil, Sra. Felisbela A. O. de Oliveira, Lic.SP.,M.SP, hateten sai senadu estudantil tenki fuan bo’ot atu rona ita nia maluk estudante sira nia hanoin no hakarak atu nune’e imi bele tenki tetu ida ne’ebé mak atu foti sai hanesan importante atu halo, maibe ida ne’ebé mak la importante la presiza halo, no sai senadu estudantil tenki firme la bele halis ba mai, atu nune’e bele rona aspirasaun maluk estudante sira nian ne’ebé hato’o hodi tetu hamutuk ho konselu reprezentativu estudante no estrutura sira tanba ne’e imi nia responsablidade.
No atu dehan ba iha senadu estudantil sesante ba imi nia sakrifisiu tomak ne’ebé imi halo la bele sura ida ne’e ami mak hakerek, ami mak konta katak iha imi nia mandatu tinan ida nia laran imi halo ona buat lubuk ida. No ba senadu estudantil eleitu nafatin kontinua ba aktividade ne’ebe mak senadu sesante seidauk halo no halo seidauk hotu imi kontinua no kria tan buat foun maibe kontinua aktividade ne’ebé sira la konsege halo, no buat ne’ebé mak sira la konsege halo ne’e tanba tempu mak la to’o atu sira bele halo tanba ne’e enkoraga nafatin imi atu diskusaun ho estrutura sira atu kontinua aktividade sira ne’ebé imi atu halo iha imi nia mandatu.
No iha tinan ida ne’e ba oin dehan katak, Anu peskiza, Anu seminariu no Anu publikasaun, tanba ne’e ita bo’ot sira presiza hanoin no diskute atu halo programa saida mak imi planu ona, no husu ba imi tenki unidade atu nune’e servisu la’o ho diak no susesu. Ba senadu eleitu sira hakruuk ba imi nia komprimisiu no juramentu ne’ebé mak imi halo ona iha ema barak nia oin, juramentu ida ne’e la’os fasil tanba ne’e oferese imi nia an hodi bele halo aktividade saida deit mak imi bele halo iha mandatu tinan ida nia laran.
Reprezenta Dekanu Fakuldade CSH, Dr. Leoneto Lic.CSH., M.AP, Apresia ba senadu estudantil sesante ne’ebé mak durante imi nia mandatu halo ona aktividade lubuk ida ho vontade rasik atu servisu hamutuk, nomós agradese ba senadu estudantil eleitu ne’ebé hetan fi'ar husi imi nia kolega sira, sai senadu estudantil tenki matan na’in, neon na’in no tilun na’in ba problema sira ne’ebé mak kolega estudante sira hasoru no karik iha aktividade ne’ebé mak fakuldade ka universidade organiza imi tenki partisipa maximu, hare ba esperiensia tinan kotuk liu ba senadu estudantil sira organiza aktividade estudante ladun partisipa, tanba ne’e imi tenki kria relasaun ne’ebe mak di'ak entre senadu estudantil nivel fakuldade sira seluk no estudante sira inklui senadu estudantil universidade sira seluk atu nune’e bele konvida sira bele mai partisipa aktividade sira ne’ebé imi atu halo.
Iha fatin hanesan Senadu estudantil eleitu hateten, fiar ne’ebé kolega estudante sira fo ne’e la’os tan figura no la’os kolega maibe sira hatene katak ita iha vizaun, misaun no programa, tanba ne’e husu ba kolega sira katak ita presiza kolabora malu hodi diskute hamutuk atu bele realiza programa ida ne’ebé mak ita hotu nia hakarak iha mandatu tinan ida nia laran,tanba ne’e ita lalika ko’alia barak maibe tenki pratika mak barak.
Entretantu iha serimónia tomada de posse ne’e partisipa husi, Vice Reitora Asuntu estudantil, Sra. Felisbela A. O. de Oliveira, Lic.SP.,M.SP, estrutura fakuldade CSH, senadu estudantil universidade, senadu estudantil fakuldade neen, sivitas akademíku fakuldade CSH inklui sivitas akademíku Universidade da Paz
Universidade da Paz nudar instituisaun Superior edukativus nebe realiza apredizazen, pesquizas, no sai servidor/pengabdian ba sidadaun sira hodi fiar metin ba direitu fundamental ema nian, tuir normas Universal sira no konstituisaun RDTL 
