FCSH ORGANIZA SERIMONIA JUDISIUM BA FINALISTA NAIN 336 IHA UNPAZ

FCSH ORGANIZA SERIMÓNIA JUDISIUM BA FINALISTA NA'IN 336 IHA UNPAZ

Dili-Universidade da Paz (UNPAZ) Liuhusi Fakuldade Siénsia Sosiais Humana, Organiza Serimónia Judisium Ba Finalista Na'in Atus Tolu, Tolu Tolunulu Resin Neen (336) Husi Departamentu Relasaun Internasional, Polítika Dezenvolvimentu (XVIII) Estudu ba Paz (X) no Administrasaun Públika (II) Tinan Akadémiku 2024, ho Tema “Siénsia Nu’udar Roman Ba Transformasaun Sosial”,Iha Salaun José Kasimiru (09/12/24).

Reprezenta Konsellu Administrasaun FNM. Dr. Julio Tomas Pinto, hateten UNPAZ ho esperasan ida katak, ita nia rai ida ne’e iha situasaun pas nia laran, tanba ne’e mak iha mós sentru estudu ba paz, ho ida ne’e UNPAZ tenki kria pas iha laran depois bele fó exemplu ba liur.

“Ita bo’ot sira hanesan alumni UNPAZ no alumni FCSH, ita bo’ot sira tenki orgullu tanba ita halo komparasaun ho universidade sira iha Timor, UNPAZ mak iha kaderizasaun ne’ebé susesu tebes, tanba husi Reitór to’o mai dosente sira Alumni hotu husi UNPAZ ida ne’e mak hatudu susesu, nune’e iha fatin servisu ne’ebé de’it UNPAZ sempre iha siginfika UNPAZ mós susesu”,tenik.

Iha fatin hanesan, Magnífiku Reitór UNPAZ, Dr. Adolmando Soares Amaral,Lic.Eco.,MM. hato’o parabens ba judisista sira hotu nomós obrigadu wa’in ba inan aman no familia sira hotu ne’ebé investe ona tempu no enerjia hodi to’o mai iha UNPAZ. Tanba ne’e atu dehan ba judisista sira hotu prosesu atu lori ita bo’ot sira mai to’o iha momentu ida ne’e lafasil, maske imi husu ida ne’e ida ne’eba, maibe inan aman nunka hirus ba ida ne’e, tanba sira-nia esperansa imi tenki susesu.

“Esperansa no mehi ne’ebé sira iha ohin bele haree imi tuir iha fatin ida ne’e, tanba ne’e hanesan oportunidade di’ak ba imi na’in hira ne’ebé tuir ona serimónia solene judisium ida ne’e, tanba ne’e mak ha’u dehan, ita nunka moe ba inan aman nia situasaun, maibe moe ba wa’in hira ita susesu tiha ona, maibe sei nafatin halo susar inan aman, ne’e ita tenki moe ba ida ne’e”,dehan Reitór.

Reitór argumenta, ita hotu tenki iha responsabilidade moral, atu fó hanoin ba ita nia governu no estadu nomós ita tenki kritiku hodi fó alternativa no sulusaun nune’e sira bele rezolve problema ne’ebé mak iha. Tanba ne’e husu ba ita bo’ot sira labele sai ema akadémiku ne’ebé haree de’it teoria sira iha livru mais la kompriende fenomena ne’ebé akontese hela iha ita nia rai.

Sorin seluk Dekanu Fakuldade CSH, Dr. Fernando D. Gusmão, A.Md.,S.IP.,M.AP. hato’o parabens ba judidista sira hotu ba susesu ne’ebé imi hetan ona, tanba ne’e, parabens mós ba inan aman nomós familia tomak, tanba susesu ida ne’e lafasil liuhusi sakrifisiu ne’ebé barak tebes durante tinan haat tuir prosesu estudu iha FCSH-UNPAZ. Ha’u fiar katak ho sakrifisiu ne’ebé ita bo’ot sira hasoru sei forma imi sai ema ne’ebé matenek no kritiku iha determinasaun ba fiar an no prontu hasoru dezafiu sira.

“Judisium ohin foin mak pasu primeiru ba imi nia moris, depois de judisium no tama ba graduasaun, imi sai husi UNPAZ maka imi sei tama ba universidade foun ida ho naran universidade moris nian, ne’ebé iha buat barak liu tan no dezafiu barak mak imi sei hasoru, tanba ne’e imi kontinua estuda no apriende kualker iha fatin ne’ebé de’it ita bele apriende beibeik, tanba estuda la’os de’it iha universidade maibe iha fatin ita moris ba mós ita bele estuda”,Dekanu enkoraja.

Reprezenta inan aman husi Judisita sira hotu, hato’o agradese ba fundadores Fundasaun Neon Metin ne’ebé funda ona Universidade da Paz, hodi prepara rekursu humanu ba Timor-Leste iha futuru, agradese mós estrutura UNPAZ ne’ebé oferese ona matenek ba ami nia ona sira iha knuk matenek UNPAZ. Tanba ne’e hakarak hato’o parabens ba judisita sira hotu ne’ebé UNPAZ prepara titulu akadémiku hodi serve povu no rai ida ne’e.

“Judisista sira uza ba imi nia direitu ba titulu ida ne’ebé imi hetan iha UNPAZ liuliu iha FCSH, hodi bele serve didi’ak rai no povu ida ne’e ba libertasaun no mantein pas no universal de umanidade, nune’e komunidade bele fó valor ba imi”,dehan repreta Inan Aman husi Judisista sira hotu.

Aliende ne’e, Reprezenta Judisita sira hotu hato’o agradese no obrigadu wa’in ba parte hotu iha Universidade da Paz, liuliu ba dosentes sira hotu ne’ebé oferese ona dedikasaun tomak no motivasaun mai ami hodi sai ema ne’ebé iha valor. Tanba ne’e agradese no obrigadu wa’in mós ba inan aman no familia ne’ebé suporta ona ami ne’ebé labele atu troka, hodi to’o mai iha momentu ida ne’e.

“Obrigadu ba dedikasaun ne’ebé fó mai ami, la’os de’it buka valor maibe sai ema ne’ebé iha valor, tanba ne’e ita hotu ne’ebé esforsu ikus mai bele lori ita ba odamatan portaun ne’ebé foun, hodi loke esperansa ne’ebé laiha limitadu’,dehan reprezentante judisista.

Entretantu Finalista Husi Departamentu Relasaun internasional ho total (158) Polítika dezenvolvimentu (20) Estudu ba Paz (15) no Administrasaun Públika (143) total finalista Husi Fakuldade Siénsia Sosiais Humana (336). Partisipa iha eventu ne’e, Magnífiku Reitór UNPAZ, Dr. Adolmando Soares Amaral,Lic.Eco.,MM. ho Estrutura Senadu Universidade. Reprezenta Konsellu Administrasaun FNM. Dr. Julio Tomas Pinto. Vise Reitores sira. Dekanu Fakuldade 6 ho Estrutura Fakuldade nian. Pro-reitores sira. Diretor ho Xefe Unidade sira. Dosente, Funsionariu, Inan Aman no Familia Judisista sira inklui Sivitas akadémiku Universidade da Paz.