FAMILIA BOOT UNPAZ APOIU SERVISU MORU IHA KAMPUS B LIQUISA

FAMILIA BO'OT UNPAZ APOIU SERVISU MORU IHA KAMPUS B LIQUISA

Dili-Unuversidade da Paz (UNPAZ) nia estrutura senadu universidade ne'ebé kompostu husi Gabinete Reitoradu, Fakuldade neen, Unidade sira, Programa estudu, Dosentes nomós Funsionariu sira, kontinua servisu apoiu estájiadus tinan akadémiku 2023, ne'ebé seidauk finaliza moru, iha Kampus UNPAZ B Liquisa (21/04).

Dekanu FCSH, Dr. Fernando Dias Gusmão, A.Md.,S.IP.,MAP. Hateten tuir despaisu ne'ebé mak husi rekursu Humanu distribui ba fakuldade sira hotu atu apoiu servisu moru iha ida-idak nia parte, iha Kampus B Liquisa. Ohin ne'e fakuldade tolu mak foin hahú hanesan CSH, Saúde Públika no Ekonomia.

"Husi parte CSH, ami fiar katak, tuir tempu ne'ebé mak determinadu ami bele remata ami nia servisu, tanba hetan apoiu mós husi ami nia estudante sira",dehan Dekanu CSH.

Iha fatin hanesan, Dekanu FSPeCM, Sr. Martins Nahak Linu, AMKL. Lic.SP., MAP. M. SP. esplika ami fahe ona grupu hodi hala'o atividade ida ne'e, tanba ne'e ami fiar katak, loron rua ami bele finaliza fondasi, tanba husi Universidade prepara ona material sira, inklui fakuldade mós prepara balun hodi suporta mós iha ami nia servisu ida ne'e.

"Ami garante to'o data ne'ebé iha, ita bele finaliza, tanba ita servisu hamutuk entre universidade nomós fakuldade, importante mak material sira preparadu, ita bele hala'o servisu ho di'ak, ho nune'e tuir data ne'ebé mak termina ita bele remata, se la remata mós, ita kontinua servisu nafatin",tenik Dekanu FSP.

Sorin seluk, Vise Dekanu Fakuldade Teknologia Agrikola, Sr. Romaldo Martins, Lic.Tec.Agr.,M. Agr. katak, ami nia servisu ne'e halo bazeia ba Universidade nian iha 27 tenki finaliza ona, tanba ne'e mak ami organiza Malu hodi hala'o servisu, ho ida ne'e ita bele dehan, semana rua nia laran ita bele finaliza.

"Ami espera katak, loraik fondasi bele hotu kedas, aban mai ita bele tula batako ona ne'ebé ami epera katak dia 27 ami bele entrega ami nia servisu ne'e",informa Nia.

Aliende ne'e, Dekanu Fakuldade Ekonomia, Dr. Alexandre de Sousa Guterres, Lic.Eco.MM. informa ami ohin komesa hahú ona servisu ne'ebé fahe ona kada fakuldade sei respondabiliza moru ne'ebé mak seidauk bele finaliza husi estájiadus sira iha Kampus ida ne'e.

"Ami nia servisu hetan apoiu mós husi estudante sira, tanba ne'e hahú ohin ba oin, ami nafatin servisu, nune'e bele finaliza tuir data ne'ebé mak determinadu ona, ho ida ne'e ami fiar katak, to'o data ne'ebé mak iha, ami sei remata ami nia servisu",katak Dekanu Fakuldade Ekonomia.

Entretantu tuir observasaun média nian ita terenu katak, ohin komesa servisu masimu husi fakuldade sira, inklui husi Universidade nian, Unidade sira nomós Estájiadus sira hotu iha Kampus B UNPAZ Liquisa.