FAKULDADE SAUDE PUBLIKA E CIENCIAS MEDICAS INTREGA ESTUDANTE ESTAJIADUS 443 BA AUTORIDADE DO SUKU MA

FAKULDADE SAÚDE PÚBLIKA E CIÊNCIAS MEDICAS INTREGA ESTUDANTE ESTÁJIADUS 443 BA AUTORIDADE DO SUKU MAUBISSE-VILA

DILI- Universidade da Paz (UNPAZ) Liuhusi Fakuldade Saúde Públika e Ciências Medicas hamutuk ho Universidade intrega estudantes estájiadu/a atus haat, haat-nulu resin tolu ba autoridade do suku Maubisse-Vila, Postu-Administrativu Maubisse, Munísipiu Ainaro, (24/03).

Iha eventu ne’e dekanu fakuldade Saúde Públika e Ciências Medicas Martinus Nahak Lino, AMKL.,Lic.SP.M.AP.,M.SP hateten universidade hamutuk ho fakuldade lori estudante estajiadus sira iha suku Maubisse hodi hala’o prátika apriendisazem iha aldeia 12.

“Ohin loron ami lori estudante hamutuk 443 ne’ebé akumula husi departamentu neen mai iha Maubisse-vila depois destaka ba aldeia 12 durante semana rua atu sira hala’o prátika apriendisazem iha kampu. Fakuldade nia kooperasaun ho autoridade sira antes ne’e ami mai dala rua ona primeiru liuhusi komunikasaun ho autoridade no depois halo mós survey ba fatin ikus mak ko’alia ho xefe suku ho autoridade lokál husu sira nia konkordánsia no identifika nia dezáfius sira ne’ebé suku iha depois ami informa ba estudante sira hodi prepara kondisaun ne’ebé sira hasoru hodi bele hala’o prátika ho di’ak,” dehan dekanu.

Dekanu iha nia parte hato’o mensazem ba estudante no komunidade sira katak estudantes hamutuk ho komunidade no komunidade hamutuk ho estudantes sira atu bele realiza prátika ba estudante sira tanbá tempu ne’e importante tebes ba sira nia estudu liliu atu rekolla dadus liuhusi vizita uma-kain hotu-hotu.

Iha fatin hanesan autoridade do suku Sr. Wilson Nivio Mendonça mós hatutan, kontenti tebes ho prezénsa estudante sira nian iha komunidade nia le’et hodi hala’o prátika no nu’udar autoridade do suku prontu atu asegura estudante sira durante prosesu prátika.

“Bemvindu ba Unpaz liliu saúde públika ne’ebé mak hili ona fatin Maubisse sai fatin ba prátika iha aldeia 12, kontenti tebes simu imi mai iha suku maubisse, suku maubisse hanesan mós imi nian suku rasik ami simu imi hanesan ami nian oan, ami sei hamutuk ho xefe-aldeia 12 prontu atu asegura imi no prontu atu akompaña imi nia prosesu durante imi halo prátika. Nu’udar autoridade ha’u fiar katak saida mak imi apriende iha imi nia universidade, imi sei prátika iha komunidade nia le’et no dezafius saida mak imi hetan sai hanesan referénsia ida ba imi atu bele fó solusaun ida ba imi iha futuru, tanbá ida ne’e imi nia prezensa iha Maubisse hanesan parte ida mós atu kontribui ba parte dezenvolvimentu liliu iha parte saúde nian iha future. Ho ida ne’e uza tempu didi’ak no aproveita semana rua ne’e ho di’ak atu nune’e iha semana rua fó rezultadu ne’ebé di’ak ba imi atu nune’e prepara imi nia kondisaun ba futuru ida ne’ebé di’ak liu,” tenik Wilson.

Partisipa iha eventu ne’e, Estrutura Universidade, Dekanu Fakuldade Saúde Públika e Ciências Medicas ho nia estutura, Parséria servisu Nagoya university, Autoridade do suku, Autoridade lokál, Dosentes no Sívitas estidante estájiadus sira hotu.