FAKULDADE ENJENARIA REALIZA SEMINARIU NASIONAL

FAKULDADE ENJEÑARIA REALIZA SEMINARIU NASIONAL

Dili-Universidade da Paz (UNPAZ) liuhusi Fakuldade Enjeñaria nia Departamentu Indústria realiza Seminariu Nasional ho Tema “Papel Enjeñaria Indústria Iha Seitor Empreededorismu No Area Saúde Seguransa Servisu Traballador Ba Dezemvolvimentu Nasinal, iha Salaun Multifunsaun Saúde Públika (21/01).

Magnifiku Reitór, Universidade da Paz, Dr. Adolmando Soares Amaral, Lic.Eco.,MM. hateten ohin buat di’ak ida ita bele haree, ita nia produtu rasik ne’ebé durante ita produs, atu mai partilla sira nia esperiensia ho ita iha fatin ne’e, ida ne’e mak ita kaer hanesan sasukat ida, teoria no metodologia ne’ebé durante ita na’in hira lo’ok ba malu iha fatin ne’e, depois sira ba pratika no sira fila fali mai divulga ho ita, husi ida ne’e bele sai sasukat ita bele hatene ita nia kualidade.

“Alin sira ne’ebé partisipa iha seminariu ida ne’e aproveita ba, matenek ne’ebé ita nia maun na’in rua ne’ebé iha, para depois ita bele organiza a’an, dezenvolve di’ak liu ita nia a’an iha tempu sira tuir mai”,dehan Reitór.

Reitór, agradese ba orador na’in rua, ne’ebé investe tempu no enerjia, bele hamutuk ho ami atu bele fahe informasaun ruma ba ita nia alin estudantre sira, informasaun sira ne’e importante lo’os bele kompleta liu tán sira nia koiñesimentu atu sira bele halo balansu entre siénsia no teoria inklui teknologia ne’ebé sira aprende, no pratika ne’ebé orador na’in rua sei demostra esperiensia durante atividade iha liur.

Dekanu Fakuldade Enjeñaria, Sr. José Manuel Maniquin, AP.,Lic.Eng.,M.Eng. hatutan iha oportunidade ida ne’e ita hakarak, ita nia alin na’in rua ne’ebé mai hamutuk ho ita hodi fahe sira nia esperiensia, ida ne’e pasparte ida husi prosesu aprendisajen iha aula, dala wain ita rona de’it siénsia teoria no pratika mai husi ita nia dosente sira, ita mós persija atu hetan informasaun sira ne’ebé akontese iha ita nia rai laran, liu-liu liga ba dezenvolvimentu enjeñaria nian, maibe espesifikamente ba iha enjeñaria indústria

“Husu ba alin estudante sira liu-liu Departamentu Indústria atu intende di’ak, hahú husi inisiu to’o nia rohan, tanba siénsia ne’e dinamiku ita persija iha vontade atu fahe hanoin hamutuk ho ita nia maluk sira atu aumenta ita nia koñesimentu”,tenik Sr. José.

Eng. Firminio dos S. Cruz, nu’udar oradór ba tema refere, apresia tebes husi Universidade da Paz, nia esforsu tomak hodi bele realiza atividade ida ne’e, tematiku ida ne’e ha’u konsidera hanesan seitor ida ba dezemvolvimentu nasional.

Nia esplika, uniku maneira industrializasaun hodi bele garantia sustentabilidade no garantia seitor produtividade, liu-liu iha seitor agrikultura, espera seminariu ida ne’e fó impaktu positivu ba estudante sira, husi seminariu ida ne’e ita atu junta forsa hamutuk, atu eleva no mellora departamentu ne’e ba oin.

“Gradua husi ne’e, labele garantia ba diploma ne’ebé ita hetan hodi ba konkore iha konkursu públiku, mais minimu ita bele kria kampu traballu ba ita nia a’an rasik no ba sosidade”, haktuir Nia.

Partisipa iha atividade refere, Magnifiku Reitór, Universidade da Paz, Dr. Adolmando Soares Amaral, Lic.Eco.,MM, Dekanu Fakuldade Enjeñaria, Sr. José Manuel Maniquin, AP.,Lic.Eng.,M.Eng. Oradór I Eng. Firminio dos S. Cruz, Oradór II Eng. Arnaldo S.Da Ressourrição. Inklui Dosente sira husi Fakuldade Enjeñaria.