![FAKULDADE EKONOMIA UNPAZ HALAO SORUMUTU HO INSTITUISAUN ETDA](https://unpaz.tl/asset/foto_berita/093.jpg)
FAKULDADE EKONOMIA UNPAZ HALA’O SORUMUTU HO INSTITUISAUN ETDA
Universidade da Paz (UNPAZ), liuhusi Dekanu Fakuldade Ekonómia ho nia estrutura hala’o sorumutu no observa ba institusaun ETDA, atu halo diskusaun kle’an kona-ba servisu hamutuk hodi haree liu bá atividade treinamentu ne’ebé mak durante ne’e sai hanesan toma atensaun husi servisu ETDA nian, ne'ebé realiza iha ETDA (26/06).
Iha sorumutu ne’e Diretór Ezekutivu ETDA, Mr. Januario M. Neto Mok, informa katak objetivu husi faze dahuluk ne'e oinsá atu koopera ho UNPAZ, hodi eleva estudante sira iha prátika nian.
"Faze ohin atu haree hamutuk oinsa ETDA ho UNPAZ kontribui malu hodi ajusta siénsia sira ne’ebé apriende hodi aplika iha prátika, Ita hahú faze husi estudante Empreendedorizmu no Kontabilidade nian, atu mai hala'o prátika estájiu iha ne'e hodi haree liu-bá soft-skill no prepara sira hodi tama iha kampu servisu nian. Nune'e Ita bele haree Ida ne'ebé mak ita bele kolabora hodi kontinuasaun estudante bele apriende barak iha klase, maibé oras ida bele mai fali hala'o prátika husi areá ne'ebé mak ami iha," tenik Diretór.
Diretór Ezekutivu ne'e afirma, ETDA hanesan sentru formasaun hodi hasa'e soft-skill husi rekursu umanu, liu-liu parte Ospitalidade, Kontabilidade, lingua no produsaun produtu. Nune'e ETDA mós prodús ona rekursu umanu ne'ebé maka kualifikadu no barak maka hetan ona servisu.
Iha fatin hanesan, Xefe departementu Empreendedorizmu Sr. Francisco da Costa, Lic.Eco., MM, mós esplika, liuhusi sorumutu no observasaun ne'e, estrutura bele haree direita oinsá jestaun no fasilidade prátika ne'ebé maka ETDA iha, nune'e bele sai lalenok ba faculdade ekonómia unpaz hodi bele perpara kurikulum no lala'ok prátika ne'ebé di'ak, atu nune'e halo ballansu teória ne'ebé maka apriende iha aula no bele hetan prátika husu formasaun ne'ebé maka sei oferese ba departementu Empreendedorizmu no Kontabilidade. Husi faze dahuluk ne'e tempu badak sei halo legál kooperasaun ETDA ho Fakuldade Ekonómia liuhusi asina Mou no Moa ho universidade.
Partisipa iha sorumutu ne'e Dekanu Fakuldade Ekonómia, Dr.Alexandre de Sousa Guterres, Lic.Eco., MM, ho nia estrutura no Diretur Ezekutivu ETDA.