FAKULDADE EKONOMIA UNPAZ ENSERAMENTU WORSHOP DURANTE SEMANA IDA

FAKULDADE EKONOMIA UNPAZ ENSERAMENTU WORSHOP DURANTE SEMANA IDA

Dili-Universidade da Paz (UNPAZ) liuhusi Fakuldade Ekonomia hala'o serimónia enseramentu workshop durante semana ida, ho tema Garantia Kualidade Ensinu Iha Fakuldade Ekonomia UNPAZ, ne'ebé realiza iha hotel Mukit Munisipiu Aileu (11/02) horseik.

Magnifiku Reitór Universidade da Paz, Dr. Adolmando Soares Amaral, Lic Eco.,MM. hateten, ANAAA la'os Parseiru, ANAAA sai ona Parseria sentru ba familia bo'ot Universidade da Paz, ba ekipa tekniku ANAAA Maun Hipolito ne'ebé investe ona tempu no enerjia hodi akompaña estrutura Fakuldade Ekonomia hodi haree padraun akreditasaun programatika nian durante semana ida iha ne'e.

"Família bo'ot Universidade da Paz ba anu letivu 2023, ita tau hanesan anu responsabilidade, katak saida mak ita hetan no rekomenda husi ita nia parseria sira, maka ita tenki rezolve no la iha rezerva. Ita nia mehi hakarak garante kualidade ensinu superior públiku no privadu iha rai ida ne'e, tenki ho responsabilidade",tenik Reitór UNPAZ.

Iha fatin hanesan, Diretor Exekutivu ANAAA I.P. Dr. Nilton Diamantino Paiva Mau S.S, MM.,Phd. apresia tebes ba esforsu Magnifiku Reitór ho Dekanu Fakuldade Ekonomia ne'ebé kria espasu hodi realiza ona workshop ida ne'e.

"Papel ANAAA atu bele kordena ho parte tekniku atu bele garante kualidade, tantu ensinu superior públiku no privadu, papel importante liu mak atu halo avaliasaun ba akreditasaun, maibe atu to'o ba ida ne'e ita presiza liu prosesu lubuk ida. Ita tenki servisu hamutuk ho Ensinu Superior públiku no privadu sira, tanba sira la'ós ita nia inimigu, maibé sira ita nia parseru",dehan Diretor ANNNA.

Diretór ne'e, Orgullu tebes Magnifiku Reitór ho Dekanu nomós sivitas akadémiku Universidade da Paz, agradese ba Fakuldade Ekonomia, tanba workshop ida ne'e sai hanesan modelu ba Fakuldade sira seluk, ita tenki prepara antes molok hasoru akreditasaun.

Sorin seluk, Dekanu Fakuldade Ekonomia, Dr. Alexandre De Sousa Guteres, Lic Eco.,MM. Salienta, durante semana ida Fakuldade Ekonomia realiza workshop iha fatin ida ne'e, hodi prepara ba rea-akreditasaun iha fulan Maiu 2023.

"Fakuldade Ekonomia prepara di'ak liu atu prepara hadia kualidade, tanba ne'e mak durante semana ida fokus liu ba lala'ok servisu ne'ebé estrutura Fakuldade Ekonomia ho estrutura universidade sei hasoru rea-akreditasaun iha tempu tuir mai",katak Dekanu.

Nia hatutan, Workshop durante semana ida, ita iha ekipa tekniku ANAAA nian, maun Hipolito ne'ebé ajuda tebes dosentes sira ba informasaun sira hotu ba preparasaun rea-akreditasaun nian.

Partisipa iha Workshop ne’e, Magnifiku Reitór Universidade da Paz, Dr. Adolmando Soares Amaral, Lic Eco.,MM.

Diretor Exekutivu ANAAA I.P. Dr. Nilton Diamantino Paiva Mau S.S, MM.,Phd. Ho ekipa. Dekanu Fakuldade Ekonomia, Dr. Alexandre De SousaGuteres, Lic Eco.,MM. Vise Reitor Assuntu Akadémiku, Dekanu Fakuldade Enjeñaria, Dekanu Fakuldade Agrikola, Diretor Unidade sira, estrutura Fakuldade Ekonomia inklui estudante sira.