![FAKULDADE EKONOMIA REALIZA BINA-AKRAP HODI HAMETIN AMIZADE DOSENTE HO ESTUDANTE](https://unpaz.tl/asset/foto_berita/1511.jpg)
FAKULDADE EKONOMIA REALIZA BINA-AKRAP HODI HAMETIN AMIZADE DOSENTE HO ESTUDANTE
Dili-Univeraidsde da Paz (UNPAZ) hala'o Serimónia Bina-Akrap husi Estudante Fakuldade Ekonomia Tinan Akadémiku 2023 ho Nia Tema "La Iha Amizade Ida Ne'ebé La Iha Domin, maibé Amizade Hotu Sempre Iha Domin" iha Salaun Catedral (11/06/23) Domingu Horseik.
Dekanu Fakuldade Ekonomia Dr. Alexandre de Sousa Guteres, Lic.Eco., MM. Hateten fakuldade ekonomia sempre amizade ho domin, tanba ne’e la iha diferensia entre estrutura fakuldade ho estudante sira, ho ida ne’e nafatin estudante sira kria amizade ho dosente sira ho di’ak.
“Husu ba estudante sira hotu husi semester ida, imi nafatin kria amizade ho estrutura dosente sira, nu’udar belun di’ak iha fakuldade ekonomia universidade da paz, ida ne’e mak importante liu iha vida akadémiku”, dehan dekanu Fakuldade Ekonomia Dr. Alexandre.
Iha fatin hanesan, Terseiru Vise Dekanu Assuntu Estudantil Fakuldade Ekonomia, Sr. Paulo Victor X. C. Soares, Lic.Eco., M. Kont. Hatutan atividade ida ne’e maske simples, maibe iha sentidu bo’ot ida, sentidu katak, la’os ita mai atu haree malu de’it, maibe oinsa estudante sira bele koñese ambiente di’ak liu tán saida mak ezerse iha fakuldade ekonomia.
“Amizade katak unidade entre estudante ho dosente sira, nomós esrtudante ho estudante, nune’e bele hametin fraternidade, tanba ne’e ativiade sira hanesan ne’e, importante lo’os ba ita bo’ot sira atu bele partisipa, ho ida ne’e ha’u espera ho atividade ida ne’e, bele loke ona ita bo’ot sira nia hanoin”, tenik Sr. Paulo.
Sorin seluk, Senadu Estudantil Fakuldade Ekonomia, Gemerino da Costa, salienta ohin ita mai hamutuk iha fatin ida ne’e, oinsa ita bele hala’o amizade para aprende hamutuk hodi organiza malu atu bele deskobre realizade.
“Mudansa sei akontese, bainhira ita sira ne’e sei la hamutuk, maibe ita sira ne’e hamutuk sai forsa ida hodi kontribui ba sosiedade, tanba ne’e amizade la’os de’it para de’it ho imi, ho ha’u no dosente sira, maibe ita nia amizade ne’e liu-husi siensia no teknologia ne’ebé ita apriende, atu hatan ba iha sosiedade”, katak Gemerino.
Entretantu iha atividade lasu amizade ne’e, estrutura fakuldade ekonomia aprezenta mós lalaok esturtura fakuldade nian ba estudante sira, atu bele koñese di’ak liu tán iha Fakuldade ekonomia universidade da paz.
Partisipa iha serimónia lasu amizade entre estudante ho dosente sira ne’e, hetan partisipa masimu husi estrutura Fakuldade Ekonomnia ne’ebé kompostu husi Dekanu Fakuldade Ekonomia Dr. Alexandre de Sousa Guteres, Lic.Eco., MM. Ho Vise Dekanu sira, Xefe Departamentu sira nomós Dosente, Funsionariu sira hotu inklui Estudante sira.