header-int

FAKULDADE DIREITU REALIZA SERIMONIA JUDISIUM BA FINALISTA NAIN 307

Selasa, 21 Jan 2025, 09:47:38 OTL - 26 View
Share
FAKULDADE DIREITU REALIZA SERIMONIA JUDISIUM BA FINALISTA NAIN 307

FAKULDADE DIREITU REALIZA SERIMÓNIA JUDISIUM BA FINALISTA NA’IN 307

Dili-Universidade da Paz (UNPAZ) liuhusi Fakuldade Direitu realiza seimónia solene judisium ba dala Sanulu Resin-Ualu (XVIII), ba judisista hamutuk Atus tolu hitu (307) tinan akadémiku 2024, iha Salaun José Casimiru (6/12/24).

Magnífiku Reitór Universidade da Paz, Dr. Adolmando Soares Amaral, Lic.Eco., MM. Apresia ba inan ama sira maske dala-barak imi nia oan sira husu osan kada fulan ho razaun ne’ebé oioin dala-ruma bosok atu selu eskola nian maibe realidade dala-ruma halo fali buat seluk, maibé imi la hirus, maske imi hatene oan sira ne’e bosok, imi nafatin pasensia iha udan laran no loron manas lahatene kolen tan de’it ita oan sira nia estudu maibe dalaruma ita oan ne’e mak laiha responsabildade ba sakrifisiu ne’ebé imi halo, maibe imi pasensia nafatin hadomi oan sira hodi ohin loron ita konsege hamrik iha fatin ida ne’e. Tanba ne’e husu imi na’in hira ne’ebé ohin simu ona títulu akademíku katak labele moe ba ita nia inan aman nia situasaun, maibe imi tenki moe wainhira susesu tiha sei nafatin halo susar inan aman, tan sira hatene wainhira ita la honestu ba sira, sira hatene katak ita bosok sira, maibe sira hakarak ita oan ne’e tenki sai ema ne’ebé mak di’ak, depois ida ne’e hotu ita oan sira hetan servisu di’ak no selu fali sira nia kolen durante sira nia pasensia mai ita, la’os selu ho osan maibe ita tenki selu sira ho domin no ajuda sira ida ne’e mak esperansa mai ita oan sira ne’ebé tuir hela prosesu aprendisajen iha universidade ida ne’e.

Inan aman nia esperansa ida ne’e mak sosiedade povu aileba sira nia esperansa, hanesan instituisaun akademíku ka ema akademíku agora ita tenki resolve buat hirak ne’ebé ita halo hatudu liu husi ita nia asaun, liuhusi siensia no teknologia ne’ebé ita aprende wainhira ita halo aktividade ruma hetan fi’ar husi sosiedade ka husi instituisaun governu nian ho instituisaun privadu nian ka balu hakarak kria rasik kanpu traballo fo espasu ba kolega sira atu hamutuk ho imi liu husi imi nia kualidade, mak halo buat ki’ik ida ba ema barak nia interese ba rai no povu ida ne’e iha Timor-Leste ida ne’e mak importante ba imi. Tenik Reitór

Iha fatin hanesan, Prezidente Konsellu Administrasaun FNM, Eng. Jose S. Menezes M. FoodTech, hato’o parabens ba susesu judisista sira nian ne’ebé ohin hala’o judisium, agradese no obrigadu ba inan aman sira ne’ebé fo konfiansa ba oan sira ne’ebé mai kontinua estudu iha Universidade da Paz, tanba ne’e lori fundasaun nia naran, hakarak hato’o agradesimentu ba estrutura fakuldade direitu ne’ebé konsege fo judisium ba judisista sira ba dala XVIII, testamuña ne’ebé ha’u atu hateten ba imi mak ita iha progresu di’ak ne’ebé to ohin loron hatudu katak ita jere universidade ne’e la’o ho di’ak .

Sorin seluk, Dekanu Fakuldade Direitu, Dr. Leonito Ribeiro, SH.,MH, hato’o agradese ba inan aman no familia sira hotu husi judisista sira ne’ebé fo fi’ar ba fakuldade direitu hodi projeta sira nia oan sira hodi kontinua estudu iha Universidade da Paz liu-liu iha fakuldade direitu, ne’ebé ohin loron termina ona sira nia prosesu aprendisajen ne’ebé durante ne’e sira hala’o to’o mai ohin loron sira no ita hamutuk iha fatin ida ne’e. Judisium mak prosesu akademíku ida ne’ebé iha, no tina-tinan ita sempre hala’o no judisium ba dahuluk ita hala’o iha 2007 mai to’o ohin loron ita nia antigus alunus sira hamutuk ho imi três mill onze (3011). No fakuldade direitu durante 20 anos produs ona estudante barak mak sai matenek nain sira iha ita nia rai doben Timor-Leste, no durante 20 anos ezistensia fakuldade direitu nia programa husi licensiatura mestradu no to’o ona iha doutoramentu.

Ami nia lia menon ba imi hotu, ohin ami husik ona imi ba sociedade, ami nia hanorin ikus ba imi mak iha tempu ezame monografia, ne’e ami koko imi nia matenek no fahe ami nia matenek ne’ebé ami iha ba imi ho ami nia fuan ho ami nia konsiensia, tanba ne’e kadi ba halo kro’at, habelar ba halo kle’an ba títulu Licensiadu ka licensiada ne’e ho responsabilidade. Títulu akademiku mak títulu ne’ebé iha ninia onra bo’ot iha ita bo’ot sira to’o mundu ne’e remata, tanba ne’e karik durante tinan balu nia laran ami korpu dosente, funsionariu administrasaun karik atende imi ladun di’ak iha minutu ida ne’e hodi sira hotu nia naran husu perdaun no agradese ba parte hotu nia kolaborasaun. Dehan Dekanu Fakuldade Direitu, Dr. Lenito.

Reprezenta Inan Aman Judisista, hateten, nu’udar inan aman laiha liafuan ida ne’ebé mak bele transmite no hakle’an ami nia sentimentu hakarak hato’o hela ba manorin sira, matenek nain sira, ne’ebé mak tinan hira nia laran ho sira nia pasensia hodi eduka ami nia oan sira to’o ohin loron sira konsege finaliza sira nia estudu iha ita bo’ot sira nia leet. Ami inan aman hanesan dalan ida no hanesan mota ki’ik ida ne’ebé bee naksulik husi loro sae to’o loro monu, husi rai ulun to’o rai ikun, ne’ebé mak turuk neineik mai to’o iha Dili hodi buka dalan le’et sira ne’ebé maka sira atu bele buka matenek nain sira iha Dili laran, ikus mai hodi sira deside no hato’o hela ba inan aman sira katak, ami eskola ona iha Universidade da Paz mak fatin ida ne’ebé furak ida ne’ebé mak bele fo matenek mai ami hodi bele kontribui ba ita nia rai doben ida ne’e. No ohin ita hotu sai testamuña liu-liu inan aman, ami haksolok tebes no orgullu ida ne’ebé maka laiha esplikasaun, tanba hela loron hira de’it ami nia oan sira simu graduasaun sira la fila hikas mai hanesan tinan hirak liu ba, ami fi’ar katak ita nia relasaun ne’ebé mak durante ne’e ita kria entre manorin no matenek nain sira, ami nia oan sira fila hikas ba horik fatin haklaken mai ami, sentimentu ida ne’e ikus mai fo duni rezultadu ida pozitivu katak la saugati ami nia oan sira nia desizaun hodi mai aprende iha matenek nain sira iha universidade da paz.

Mensagen ba ita bo’ot sira mak ne’e, tau Universidade da Paz iha imi nia fuan, tanba naran ida paz ne’e nia kle’an no klaru la halimar, fi’ar imi nia an labele pesimista ba imi nia matenek argumenta imi nia matenek ho maluk sira seluk ne’ebé gradua husi rai sira seluk. No tenki fi’ar imi nia an nomós fi’ar ba imi nia matenek ne’ebé mak imi hetan iha universidade da paz. Labele halo an labele loko an ba matenek ne’ebé mak imi iha husu ba ita bo’ot sira labele hadok-an wainhira hasoru matenek nain sira husi rai liur. No imi tenki haraik an labele moe hodi hamoe imi ninia an katak imi mai husi universidade da paz. Ikus liu husik hela lia menon ba ita bo’ot sira katak, La ho MAROMAK ita la bele halo buat ida, ho MAROMAK ita bele halo buat hotu, ho UNPAZ ita bele halo buat hotu, La ho UNPAZ ita la bele halo buat ida.

Unidha Universidade da Paz nudar instituisaun Superior edukativus nebe realiza apredizazen, pesquizas, no sai servidor/pengabdian ba sidadaun sira hodi fiar metin ba direitu fundamental ema nian, tuir normas Universal sira no konstituisaun RDTL
© 2025 Universitas da Paz Follow Universitas da Paz : Facebook Twitter Linked Youtube