ESTUDANTE UNPAZ HALO REFLESAUN HODI KOMEMORA LORON NASIONAL 12 DE NOVEMBRU

ESTUDANTE UNPAZ HALO REFLESAUN HODI KOMEMORA LORON NASIONAL 12 DE NOVEMBRU

Dili-Universidade da Paz (UNPAZ) nia estudante sivitas akadémiku sira hotu, halo reflesaun ba komemorasaun loron Nasionál 12 de Novembru 2023, hodi hanoin hikas heroi sira ne’ebé sakfrifika an tomak iha tempu liuba no ohin loron ita sai hanesan nasaun, Repúblika Demokratika de Timor-Leste (RDTL), iha Salaun Jose Casimiro (11/11).

Magnífiku Reitór Universidade da Paz, Dr. Adolmando Soares Amaral, Lic. Eco.,MM, hateten se laiha ita nia maun, tiun ka avo sira, iha tinan hirak liu ba halo asaun ida ne’e, maka mundu sei la rekoñese ita hanesan nasaun, tanba ne’e husu ba estudante universitariu sira hotu liu-liu senadu sira husi fakuldade to’o universidade, atu organiza estudante sira para aban ita ba hamutuk ho komiasaun 12 de Novembru hodi komemorasaun loron 12 de Novembru ba tinan 2023 nian iha santa kruz, tanba ita haree fila fali ba kotuk, sira lubuk ida, agora dadauk ita labele haree sira-nia isin no ruin sira, maibe responsabilidade moral hanesan joventude iha erra milineal ba oras ida ne’e, ita aopiu sira ho orasaun de’it no reza ba sira ho sira-nia familia, atu prontu simu realizadade ida ne’e, tanba agora dadaun familia mós la hetan sira-nia isin no ruin.

“Husi sira ohin ita bele iha ne’e, husi sira ohin ita bele iha estadu ida, ita bele iha Prezidente, Primeiru Ministru, Ministru, sekretariu Estadu, Diretor Geral, Xefe Departamentu, Funsionariu no Sektor Privadu sira bele halo sira-nia atividade nomós ita bele hari’i Universidade ida, hodi nafatin fahe hanoin ba malu, aprende siensia no teknologia, para bele hatan ba sira-nia mehi, sira ne’ebé mak iha momentu ne’eba investe ona sira-nia vida, maibe sira labele goja ida ne’e, maibe bainhira sira hakarak haree povu no rai ida ne’e kontente dezenvolvimentu la’o povu moris hakmatek, maka sira kontente ho ita sira ne’ebé mak agora kontinua sira-nia mehi”,Tenik Reitór.

Nia dehan, Pekadu bo’ot ida ba ita mak, bainhira ita la konkretiza sira-nia mehi bo’ot ne’e, ita mai aprende siensia no teknologia, depois ita ba halo fali atividade individual, ita haluha ita nia nasionalizmu no patriotizmu ba povu no rai ida ne’e, ida ne’e hahalok ne’ebé la’os joventude sira iha tinan rua nulu ba kotuk halo, maibe iha erra milineal ho teknologia ne’ebé abansadu, ita lakon tiha ita nia sentidu ba patriotizmu no nasionalizmu, ida ne’e labele akontese ba ita, espiritu sira nia tenki moris nafatin ho ita no doko nafatin ita, maske ita doko lahanesan sira doko iha tempu ne’eba, maibe ita doko tuir nafatin.

Líder masimu ne’e salienta, akompaña evulusaun ne’ebé mak la’o, ita tenki hateten ba mundu katak, sira uluk fó sira-nia vida, ami agora aprende siensia no teknologia, no sira uluk fó sira-nia vida para bele sai nasaun, ami agora ho ami nia tempu atu aprende depois lori nasaun ba mundu para ema bele koñese. Tanba ne’e, husu ba estudante sira hotu aproveita tempu ne’e ho didi’ak no halo jestaun ba tempu ne’e ho di’ak, aprende siensia no teknologia, la’os atu haruka imi ba mate, maibe atu haruka imi oinsa bele hamorin nasaun Timor-Leste iha mundu internasional liuhusi sektor oi-oin.

Aban ita ida-idak sei espresa ita nia hanoin, ba oin saida mak hotu-hotu nia hakarak ba povu no rai ida ne’e, tanba ne’e ha’u hakarak aban UNPAZ ko’alia barak iha palku leten katak, ami nia hanoin hanesan joventude iha erra milenial, ba oin mak ida ne’e, tanba ne’e ha’u hakarak imi hatudu imi nia kapasidade intelektual, imi nia kreatividade no inovativu ho imi nia jestu sira iha palku leten aban iha santa kruz, Nia hakotu.