ESTUDANTE OE-CUSSE HO DOSENTE MATERIA HALO VIZITA BA FATIN AKONTESE KRIMI OMNESIDU IHA PERIODU LUTA

ESTUDANTE OE-CUSSE HO DOSENTE MATERIA HALO VIZITA BA FATIN AKONTESE KRIMI OMNESIDU IHA PERIODU LUTA LIBERTASAUN NASIONAL RDTL

Dili-15 de Dezembru 2023, Universidade da Paz (UNPAZ) liuhusi Dosente Materia Santino Barros, Lic.SCH.,PGradDipDevSt, hala’o atividade aprendizajen aula iha Kampus sanak Oe-cusse, aleinde oferese materia sira iha sala laran, aumezmu tempu lori estudante sira ba vizita fatin istóriku sira liu-liu fatin sira ne'ebé akontese krimi omnesidu iha períodu luta Libertasaun Nasionál RDTL nian.

Dosente ne’e esplika, Liga ba Dixiplina Justisa Tranzisionál nu'udar dixiplina importante ida ho nia objetivu hanorin atu estudante sira hatene kona-ba hahalok krimi violasaun Direitu Umanu ne'ebé akontese iha pasadu nu'udar eransa aat atu estudante/jerasaun foun sira bele hatene no garante sei la akontese tan iha tempu Ukun Rasik Aan ne'e no ba oin.

“Programa aula iha kampu ne'e, dosente Santino Barros, Lic.SCH.,PGradDipDevSt, lori estudante sira ba vizita fatin akontesimentu krimi omnesidu husi grupu pro-otonomista iha iha loron 20 Outubru 1999 nian iha Bairru Makelab Suku Teboko Lifau Oe-cusse Ambenu. Tuir sasin moris Sr. Ernesto katak vitima sira mate balu hetan oho ho tudik, tiru ho kilat no sunu moris hamotuk ho vitima nia uma hela fatin ho total na'in sanulu resin hitu (17) mate iha loron ida”,temik.

Iha fatin hanesan, Dosente enkoraja estudante sira, atu hakerek inan-aman sira-nia memória luta Libertasaun Nasionál RDTL nian, nu'udar métodu ida, atu inan-aman bele transmite sira-nia istoria luta liuhusi narativu.

Métodu refere dosente aplika ona desde tinan 2019 liubá no to'o dadaun ne'e iha ona livru tolu no publika ona husi Centro Nacional Chega! I.P. (CNC).

Livru sira ne'ebé publikadu, dosente entrega balu ba estudante no rai mós iha Biblioteka Kampus sanak UNPAZ Oe-cusse.