ESTUDANTE NAIN 78 HUSI FAKULDADE EKONOMIA PARTISIPA TREINAMENTU KONTABILIDADE DIGITAL

ESTUDANTE NA’IN 78 HUSI FAKULDADE EKONOMIA PARTISIPA TREINAMENTU KONTABILIDADE DIGITAL

Dili-Universidade da Paz (UNPAZ) liuhusi Senadu Estudantil Fakuldade Ekonomia hala’o kolaborasaun ho fasilitador Bazilio Miranda Monteiro, hodi fasilita treinamentu “KONTABILIDADE DIGITAL” ba Estudante hamutuk hitu nulu, resin ualu (78) ho objetivu atu eleva koñesimentu estudante sira-nia iha área Kontabilidade Digital nian, nune'e bele prepara aan di'ak ba futuru, iha Aula Multifunsaun FSPeCM (26/08).

Vice-Dekanu Asuntu Estudantil Fakuldade Ekonomia, Sr. Paulo Victor X.C. Soares,Lic. Eco.,M. Kont. kongratula ba senadu estudante fakuldade ekonomia, ho sira-nia kolaborasaun no esforsu hodi realiza atividade ida ne’e, tanba ne’e husu ba estudante sira presiza proativu liu-liu iha prosesu aprende sira hanesan ne’e, buat sira ne’e hotu fila fali ba ita bo’ot sira, atu aproveita di’ak prosesu sira ne’e hotu, ita boot sira tenki asesu ba informasaun sira husi fakuldade, senadu nomós esterna sira.

“Husu ba ita boot sira atu aproveita tempu ne’e ho di’ak, buat ne’ebé ohin imi aprende bele sai hanesan referensia ba ita boot sira, tanba agora ita tama ba iha erra digitalizasaun, liu-liu ita sira ne’ebé aprende ekonomia no ita boot sira espesifiku ba kontabilidade, entremus aprende teoria tenki mós ho pratika sira, tanba ne’e aprende didi’ak no utiliza tempu ne’e ho di’ak, maske loron ida, ha’u fiar husi referensia no informasaun sira ne’ebé hato’o ba ita boot sira, bele hetan koñesimentu ne’ebé mak di’ak, hodi prepara ita boot sira-nia aan ba iha futuru”,dehan Nia.

Iha fatin hanesan, Senadu Estudante Fakuldade Ekonomia UNPAZ, Gemerino da Costa, hateten atividade ida ne’e, rohan husi estrutura senadu estrudante nia mandatu 2022-2023, tanba ne’e husu ba estudante sira ne’ebé atu eleitu ba senadu 2023-2024, nafatin kria ativiadde sira hanesan ne’e, hodi bele fahe koñesimentu husi formador sira ba ita, oinsa bele kompleta malu.

Entretantu Treinamentu Kontabilidade Digital ne’e, Fasilitadór Bazilio Miranda Monteiro. No abertura husi Vice-Dekanu Asuntu Estudantil Fakuldade Ekonomia, Sr. Paulo Victor X.C. Soares,Lic. Eco.,M. Kont. Partisipa husi Estudante (78) ne’ebé kompostu husi Departamentu haat, iha Fakuldade Ekonomia, Universidade da Paz.