ESTUDANTE NAIN 49 HUSI FTA DEPARTAMENTU KONSERVASAUN REKURSU NATURAIS ENSERAMENTU ESTAJIU PROFISIONA

ESTUDANTE NA'IN 49 HUSI FTA DEPARTAMENTU KONSERVASAUN REKURSU NATURAIS ENSERAMENTU ESTAJIU PROFISIONÁL

Dili-Universidade da Paz (UNPAZ) nia estudante haat nu'u resin sia, (49) semester V husi Fakuldade Teknologia Agrikola, Departamentu Konservasaun Rekursu Naturais, hala'o serimónia enseramentu estajiu profisionál tinan akadémiku 2023, iha Kampus Ramu UNPAZ Likisa (16/02) horseik.

Vice Reitor Assuntu Estudantil no Antigus Alunus, Sra. Marilia Juvi Gonçalves, Lic.Sp.,M.Kes. ne’ebé reprezenta Magnifiku Reitór UNPAZ, hateten ita bo’ot sira prátika iha rua, prátika laboratorium ba analiza no pratika iha komunidade, ita bo’ot sira agora prátika ne'e, prátika laboratorium komunidade.

“Iha tempu sira tuir mai, ita bo'ot sira mós bele halo promosaun ba iha komunidade sira, oinsá sira bele hatene halo kona-ba adubus no prepara fatin ba kuda sira nia ai-horis ne'ebé mak ho di'ak. Ita espera katak, ba oin ho ita bo’ot sira nia prejensa, no estudu pratika agora dadauk hatudu katak, fakuldade Teknologia Agrikola ema mai sei la sura ho liaman fuan, maibé sura ho fuk lahan no sura sei la hotu”,dehan Sra. Marilia.

Nia reforsa, dala barak ema dehan buat ne'ebé ita halo ki’ik, fasil ba ema dehan buat ne'ebé ki’ik, maibé defísil ba ita b’ot sira atu halo buat ki’ik ida ne'e, koko husi ki’ik mak sei sai ba bo’ot, tanba ida ne'e nu'udar prosesu ida, se ha'u la liuhusi prosesu konserteza, ha'u labele atu susesu, hadomi ba ha'u nia prosesu, tanba liuhusi ha'u nia prosesu mak bele hetan dalan susesu.

Iha fatin haneasn, Dekanu FTA, Sr. Jonio dos Santos, Lic.Tec.,M.Agr. salienta, bai-bain Fakuldade Teknologia Agrikola, iha tinan liu ba estajiu profisionál lolo’os la akontese iha fulan Janeiru ka Fevereiru nia laran iha semester impar la iha, lolo’os ne'e iha semester par. Baibain estajiu profisionál ba departamentu Konservasaun rekursu Naturais ne'e, iha etapa rua etapa ida iha semester IV no etapa rua semester VI no ba departamentu prosesamentu ai han nian dala ida de'it.

“Maske iha situasaun defísil balu ne’ebé mak imi hasoru, maibé ida ne'e mak lala'ok akadémiku ne'ebé akontese iha instituisaun sira, ha’u fiar imi ho laran haksolok hodi hasoru situasaun sira ne'e hotu, nune'e la kleur imi bele finaliza imi nia estudu iha Fakuldade Teknologia Agrikola Universidade da Paz. Agradese ba imi nia servisu durante semana tolu nia laran, ho imi nia esforsu tomak bele finaliza imi nia servisu ida ne'e”,tenik Dekanu FTA, Sr. Jonio.

Sorin seluk, Estudante, Serafin dos Santos missa, agradese ba universidade bele fó biban mai iha fatin ida ne'e, espesialmente ba iha Fakuldade Teknologia Agrikola, bele fó oportunidade ba ami hodi haklean liu tán ami nia koñesimentu liu-liu iha atividade prátika nian, durante semana tolu nia laran. Agradese ba parte autoridade lokál sira hotu ne'ebé mak iha ne'e, apoiu ona ami hodi hala'o atividade pratika durante semana tolu iha ne'e.

Entretantu partisipa iha serimónia enseramentu atividade pratika ne’e, Vice Reitor Assuntu Estudantil no Antigus Alunus, Sra. Marilia Juvi Gonçalves, Lic.Sp.,M.Kes. Dekanu FTA, Sr. Jonio dos Santos, Lic.Tec.,M.Agr. Dekanu Fakuldade Enjeñaria UNPAZ, Sr. José Manuel Maniquin, AP., Lic. Eng.,M.Eng. estrutura Fakuldade Teknologia Agrikola, Funsionariu inklui Estudante sira.