ESTUDANTE NAIN 322 FAKULDADE DIREITU UNPAZ ABERTURA ESTAJIU PROFISIONAL

ESTUDANTE NA’IN 322 FAKULDADE DIREITU UNPAZ ABERTURA ESTAJIU PROFISIONÁL

Dili-Universidade da Paz (UNPAZ) nia estudante atus tolu rua nulu resin rua (322) semester V husi Fakuldade Direitu hala’o serimónia abertura estajiu profisional, iha Salaun Jose Kasimiru (13/02).

Magnifiku Reitór Universidade da Paz, Dr. Adolmando Soares Amaral, Lic.Eco.,MM. hateten, UNPAZ kada tinan ita iha estajiu rua, hanesan estajiu profisionál no estajiu sosial no agora ita bo’ot sira ne’ebé semester V, ita bo’ot sira iha direitu tomak atu partisipa iha estajiu profisional, husi estajiu profisionál no estajiu sosiais, ita atu fila fali ba iha sosiedade.

Nia hatutan, kualidade ensinu superior Universidade da Paz Fakuldade Direitu ho nia Departamentu Siensia Direitu, depende ba ita bo’ot sira ne’ebé durante absolve siensia no teknologia iha área direitu, prosesu aprendisajen ita bo’ot sira tuir ona, no agora komunidade haree hela katak, siensia ne’ebé imi apriende durante ne’e, wa’in iha imi ba halo estajiu profisionál no estajiu sosiais imi bele demostra ka lae.

“Wa’in hira imi demostra kuandu sira simu, automatikamente iha tempu ne’eba sira sei hateten, direitu Universidade da Paz ne’e, rekursu sira ne’ebé iha kualidade, Wa’in hira komunidade hateten ona ita iha kualidade, maka iha rai ida ne’e, laiha ema ida atu kestiona kualidade ensinu superior ida, sa tán Universidade da Paz, Fakuldade Direitu Siensai Direitu”,dehan Reitór UNPAZ.

Reitór relata, ema ne’ebé iha direitu tomak atu kestiona kualidade mak merkadu, merkadu mak sé, merkladu mak sosiedade, tanba sira mak haree sira mak sente, saida mak ita halo, tanba ne’e sira mak bele hatene ida ne’e kualidade ka la kualidade.

Timor ita hotu nia respnsabilidade moral, tanba povu ida ne’e presija ita bo’ot sira nia intervensaun no ita bo’ot sira nia hanoin, para lori sira atu kompriende lei iha rai ida ne’e, tanba ne’e, ha’u husu ba imi, sé mak halo sala ba lei iha rai ida ne’e, imi tenki ko’alia, labele tauk mate, imi mate ba interese ba ema barak nian, ida ne’e imi sai heroi ba nasaun ida ne’e, Nia Subliña.

Iha fatin hanesan, Dekanu Fakuldade Direitu UNPAZ, Dr. Leonitu Ribeiro, SH.,MH. katak, estajiu profisionál tuir kalendariu akadémiku iha semester V tanba ne’e, estajiu ida ne’e ba iha terenu atu kolabora no pratika, estajiu iha tinan ida ne’e, estudante sira sei hala’o estajiu iha Munisipiu hanesan Likisa, ermera inklui Dili.

Nia hatutan, estajiu tinan ida ne’e la hanesan ho tinan uluk nian, tanba tinan uluk ita hala’o estajiu sena rua de’it, maibe tinan ida ne’e, iha mudansa ba estajiu fulan ida.

“Estajiadu/a sira nafatin koidadu imi nia saúde, tanba saúde importante tebes, no importante liu mak ita bo’ot sira sai ba liu tenki adapta ho ambiente, no halo kominisaun di’ak ho parte autoridade lokal sira, tanba ne’e estajiu ida ne’e nu’udar meus ida atu koko imi nia matenek”,tenik Dekanu Fakuldade Direitu UNPAZ, Dr. Leonitu.

Partisipa iha ativiade ne’e, Magnifiku Reitór Universidade da Paz, Dr. Adolmando Soares Amaral, Lic.Eco.,MM. Dekanu Fakuldade Direitu UNPAZ, Dr. Leonitu Ribeiro, SH.,MH. Estrutura Fakuldade Direitu inklui Estudante Estajiadu/a sira.