ESTUDANTE HUSI FSPeCM UNPAZ HALO SOSIALIZASAUN BA MORAS DENGUE IHA ESKOLA 30 DE AGOSTU

ESTUDANTE HUSI FSPeCM UNPAZ HALO SOSIALIZASAUN BA MORAS DENGUE IHA ESKOLA 30 DE AGOSTU

Dili-Universidade da Paz (UNPAZ) liuhusi estudante Fakuldade Saúde Públika e Ciensia Medica (FSPeCM) ne’ebé kompostu husi estudante semester I-7 hala’o atividade sosializasaun kona-ba moras dengue ba estudante sira, iha eskola EBC 30 de Agostu, Comoro Dili (30/06/23).

Diretor EBC 30 de Agostu Vitorino da Silva Marques, Lic. Ed. hateten ohin estudante husi universidade da paz, mai halo formasaun kona-ba moras dengue nian iha eskola ida ne’e, nu’udar Diretor EBC 30 de Agostu, orgullu tebes tanba estudante husi UNPAZ ohin primeira-vez bele fó tempu mai iha fatin ida ne’e, hodi halo formasaun kona-ba moras dengue nian.

“Ami sente orgullu tebes tanba ohin ita bo’ot sira bele mai fahe esperensia ka halo sosializasaun moras dengue ba alin sira iha eskola EBC 30 de Agostu”,Tenik Diretor EBC 30 de Agostu Vitorino.

Iha fatin hanesan, Senadu Estudante FSPeCM, Panteleão Apariçio Cansio, informa atividades sosializasaun no formasaun kona-ba moras dengue ne’e, inisiativa husi ami estudante rasik, tanba Ita haree ba númeru morás dengue ne’ebé mak as tebes iha ita nia rai.

“Ho ida ne’e mak, inisiativa husi ami hakarak atu halo promosaun iha eskola refere, hodi partilla informasaun ba iha maluk estudante sira iha Eskola sira, nune’e sira bele fahe tutan ba iha familia no komunidáde sira, atu bele halo prevensaun ba moras dengue, ne’ebé ita hotu preokupa, espera katak husi ida ne’e, sira bele halo ona prevensaun, bazeia ba informasaun ne’ebé ami fahe ona”,dehan Nia.