ESTUDANTE FTA UNPAZ REALIZA DISKUSAUN HAMUTUK

ESTUDANTE FTA UNPAZ REALIZA DISKUSAUN HAMUTUK

Dili-Universidade da Paz (UNPAZ) liuhusi senadu Fakuldade Teknologia Agrikola servisu hamutuk ho senadu geral estudantil UNPAZ, hodi realiza diskusaun ho topiku “Produtu Importasaun Fó Kontribuisaun Ekonomia Iha Timor-Leste Ka Lae?,atividade ne’e realiza iha Salaun José Casimiro (11/05).

Vise Dekanu FTA, Sr. Jose Soares, L. Agrn. hatetn ita mai iha ne’e la’os atu buka oin, maibe ita mai iha ne’e atu hetan espasau nu’udar estudante, oinsa mak bele mak ida-idak nia an iha futuru bele sai hanesan estudante ne’ebé preparadu, ita labele sai penonton ba ita nia nasaun, ba ita nia universidade, iha ita nia fakuldade nomós ba iha ita nia departamentu sira.

Vise ne’e, agradese wa’in ba senadu geral universidade da paz, bele servisu hamutuk ho senadu fakuldade agrikola hodi forma ekipa ida ne’e, oinsa bele prepara grupu diskusaun ida ne’ebé ho nia titulu Produtu Importasaun Fó Kontribuisaun Ekonomia Iha Timor-Leste Ka Lae, tanba ita bo’ot sira mak sai ibun tilun matan ba informasaun ba titulu ida ne’e.

“Husi titulu ida ne’e mak atu aumenta, ita bo’ot sira-nia koñesimentu iha parte kreativu no inovativu hodi dezenvolve kapasidade tuir ida-idak nia abilidade, la’os hetan de’it iha sala de aula, maibe ida ne’e sai nu’udar materia estrakurikuler ida ba imi, atu bele sai maduru iha imi nia futuru”,dehan Vise Dekanu FTA.

Iha fatin hanesan, Senadu Geral Estudantil, Efrem Mariz Pinto, hateten diskusaun ida ne’e hanesan semana liuba ita servisu hamutuk ho senadu estudantil sira seluk, hodi realiza diskusaun hamutuk no ohin loron fakuldade teknologia agrikola, realiza tán diskusaun ho tema ne’ebé mak, Produtu Importasaun Fó Kontribuisaun Ekonomia Iha Timor-Leste Ka Lae.

“Durante semana ida servisu hamutuk ho komisaun, ohin loron konsege realiza duni diskusaun ida ne’e, tanba ne’e diskusaun ida ne’e nu’udar programa ida ne’ebé mak ita hakarak dezenvolve estudante sira nia kapasidade no koñesimentu, oinsa bele haree liu-liu problema sira ne’ebé mak ita nia estadu ida ne’e hasoru”,dehan Senadu Geral Efrem.

Sorin seluk, Komisaun Organizadóra ba diskusaun FTA, Adelino dos Santos, haktuir diskusaun ida ne’e hanesan atividade estra ida husi fakuldade, maibe ida ne’e hanesan kaderniza ita nia kolega sira, oinsa bele ko’alia ho di’ak no hasa’e mentalidade liu-liu sira nia koñesimentu, hodi haree situasaun reál ne’ebé akontese iha Timor-Leste.

“Diskusaun ida ne’e mós nu’udar parte ida loke estudante sira hotu nia hanoin, estudante labele tur de’it iha aula laran koko mós aplika iha liur”,tenik Komisaun Organizadóra Adelino.

Entretantu diskusaun ida ne’e, realiza husi Estudante Fakuldade Teknologia Agrikola, ne’ebé kompostu husi Estudante semester I, III no V, iha ne’ebé partisipa husi Sivitas Akadémiku sira hotu, nomós konkorentes sira.