ESTUDANTE FSPeCM NA\'IN 448 DESLOKA BA MAUBESI

ESTUDANTE FSPeCM NA'IN 448 DESLOKA BA MAUBESI

Dili-Universidade da Paz (UNPAZ) liuhusi Fakuldade Saúde Públika e Ciensis Medica (PSFeCM) nia estudante atus haat haat nulu resin ualu (448) ne'ebé kompostu husi departamentu neen, ohin desloka ba Postu Administrativu Maubesi, hodi hala'o atividade prátika Kampu segundu no terseiru durante fulan ida, semana rua, iha Postu Administrativu Maubesi Munisípiu Ainaro (01/08).

Magnífiku Reitór Universidade da Paz, Dr. Adolmando Soares Amaral, Lic.Eco.,MM. hateten prátika aprendizajen de kampu ida ne’e, la’os buat foun ba imi saúde públika, maibé ne’e dala rua ona ba imi, primeiru hanesan reitor husu ba imi katak siensia no teknologia ne’ebé imi aprende durante kampus, agora mak imi foin aprende demostra iha baze, iha ne’eba iha ita nia inan aman, iha ita nia avo sira, iha familia sira, sira sei haree no husi ne’e sira mak julga ita katak UNPAZ FSPeCM ne’e nia kualidade ne’e.

"Kualidade ne’e la'ós haree ba dekanu, haree ba xefi departamentu sira ka ou haree ba vise dekanu ka ou dosente sira ne’ebé ho kualifikasaun akademiku mesteradu ka doutoramentu, kualidade la haree ba kualifikasaun akademiku. Kualidade haree husi ema nia asaun, bainhira imi bele implementa siensia no teknologia ne’ebé mak imi aprende iha fakuldade ida ne’e, iha departamentu sira ne’ebé imi hili ba ne’e, iha ne’eba ho di’ak sira haree no sira senti mak iha momentu ne’e sira bele julga katak, universidade da paz, estudante husi saúde públika e siensia medikas ne’e, mesak rekursu ne’ebé bele sai alternativa ba povu ho rai ida ne’e iha tempu sira tuir mai",Tenik Reitór

Iha fatin hanesan Deksnu FSPeCM, Dr. Martinus Nahak Lino, AMKL. Lic.SP. MAP. M.SP. Hatutan Ohin loron dia 1 de agostu, tuir planu Akadémiku, ita tenki destaka fila-fali ba Maubisi, ba grupu sanulu resin rua, (12) hodi kontinua pratika segundu no terseiru, espera imi hatene ona kontinuasaun, oinsa atu halo atividade fisiku no non fisiku hodi bele avalia iha mudansa ba ita nia atividade sira ne’ebé ita halo hamutuk ho komunidade.

"Atividade sei hala'o fulan ida ho balu, husu ba oan sira atu la’o ba ho disiplina ba ida-idak nia-an, husu ba imi la’o ba kuidadu an no kuidadu malu nu’udar feton ho naan, bin alin no maun sira, imi ba ne’eba, para atu pratika aprendizajen de kampu ho komunidade, atu halo pratika kona-ba área saúde públika nian, oinsa atu halo promosaun, oinsa sira bele mudansa sira-nia hanoin ka sira nia moris atu bele prevene sira, labele monu ba moras",Dehan Dekanu.