ESTUDANTE FAKULDADE ENJENARIA UNPAZ NA\'IN 230 ABERTURA ESTAJIU PROFISIONAL

ESTUDANTE FAKULDADE ENJEÑARIA UNPAZ NA'IN 230 ABERTURA ESTAJIU PROFISIONÁL

Dili-Universidade da Paz (UNPAZ) liuhusi Fakuldade Enjeñaria hala'o serimónia abertura estajiu profisionál ba estudante atus rua tolu nu'u (230) ne'ebé kompostu husi Departamentu tolu, Departamentu Enjeñaria Sivil (131), Departamentu Indústria (28), Departamentu Arkitetura (70) ba tinan Akadémiku 2023, iha Salaun Jose Kasimiru (11/02).

Magnifiku Reitór Universidade da Paz, Dr. Adolmando Soares Amaral, Lic.Eco.,MM. hateten iha serimónia abertura ne'e katak, kada tinan kalendariu akadémika Universidade da Paz, atividade mak hanesan, estajiu sosial no estajiu profisionál, tanba ne 'e serimónia atividade estajiu profisionais Fakuldade Enjeñaria, hodi ba halo estudu pratika iha kampus ramu rua hanesan kampus ramu Liquisa no Covalima.

Nia hatutan, estudante sira tenki hatudu atitude ne'ebé di'ak ba iha komunidade, siensia no teknolia ne'ebé aprende durante ne'e, fila fali ba halo estudu pratika iha komunidade, nune'e bele rezulta dezenvolvimentu ne'ebé di'ak ba povu no rai ida ne'e, hanesan ema enjeñaria tenki fó kontribuisaun liuhusi siénsia no teknolojia ne'ebé mak imi aprende oan.

"Oras ne'e dadauk, Universidade da Paz La'os alternativa, maibe Universidade da Paz sai ona opsaun ba iha sosiedade, tanba ne'e agradese ba sosiedade nia komfiansa hodi investe oan sira kontinua mai aprende iha Universidade da paz, ita hamutuk sai forsa ida ba povu no rai ida ne'e",dehan Reitór.

Iha fatin hanesan, Dekanu Fakuldade Enjeñaria UNPAZ, Sr. José Manuel Maniquin, AP., Lic. Eng.,M.Eng. salienta tinan tinan atividade traballu pratika iha ita nia kurikulum ne'e, hanesan materia ida, tanba ne'e estudante sira hotu tenki partisipa iha programa ida ne'e, nu'ne'e bele responde ba situasaun ohin loron nian.

"Estudante sira tenki aproveita didi'ak tempu ida ne'e, tanba nia durasaun fulan ida de'it, ho ida ne'e, husu ba ita bo'ot sira nafatin hatudu imi nia komportamentu di'ak iha sosiedade no hatudu imi nia an hanesan ema finalista",tenik Maniquin.

Entretantu partisipa iha atividade serimónia abertura estajiu profisionál Fakuldade Enjeñaria ne'e, Estrutura Fakuldade, Vice Reitór Assuntu Akadémiku, nomós estudante Estajiadu/a sira, iha Universidade da Paz.