ESTUDANTE DEPARTAMENTU KRN HALO ESTUDU KOMPARATIVU BA IHA GRUPU HORTIKUITURA HADALA AILEU

ESTUDANTE DEPARTAMENTU KRN HALO ESTUDU KOMPARATIVU BA IHA GRUPU HORTIKUITURA HADALA AILEU

Dili-Universidade da Paz (UNPAZ) nia Estudante Fakuldade Teknologia Agrikola Departamentu Konservasaun Rekursu Naturais semester VII, akompaña direta husi Dosente Eng. Romaldo Martins M, Agr, hodi hala'o Estudu komparativu iha Grupu Hortikultura Hadala, ne'ebé Lokaliza iha Munisípiu Aileu Postu Aileu Villa Suku Seloi Malere Aldeia Mauntai (02/02/24).

Iha estudu komparativu hetan esplikasaun husi Xefe Grupu Hadala Sr. Florindo de Araújo, ko'alia kona-ba pratika hortikultura ne'ebé sira halo durante ne'e la uza adubus kimiku, maibe utiliza de'it ai-tahan no adubus sira ne'ebé la kontamina ho kimiku, tanba atividade ne'ebé sira hala'o hetan apoiu husi parseiru Coica husi Nasaun Corea Sul.

Iha parte seluk estudante sira mós tun diretamente hodi observa pratika atividade hortikultura ne'ebé to'os na'in sira halo. Iha to'os refere, to'os na'in sira kuda modo ho espesia oi-oin hanesan modo Boksoi, Repollu, Alfase no seluk tan. Estudante sira mós haree diretamente adubus organiku ne'ebé to'os na'in sira prepara hodi utiliza ba atividade hortikultura.

Ho estudu komparativu refere, reprezentante estudante ho naran Serafin Missa dos Santos, hato'o agradese ba grupu hortikultura hadala, tanba bele partilla hanoin no esperensia ne'ebé iha ba ami estudante sira, oinsa bele tulun ami bele sai rekursus humanus ne'e di'ak ba Rai doben Timor-Leste iha futuru mai.