ESTUDANTE BA PROGRAMA PAK NAIN 80 IHA POSTU NAIN FETO

ESTUDANTE BA PROGRAMA PAK NA’IN 80 IHA POSTU NAIN FETO

Dili, 16 Abril 2025 - Universidade da Paz (UNPAZ) Estudante ba atividade PAK nain ualu nulu (80) iha Posto Administrativo Nain Feto Munisípiu Dili, akompaña husi Dosente orientador sira.

Administrador Postu Administrativu Nain Feto Munisípiu Dili, Luis Casimiro Lopes, hateten prevelejiu bo’ot ba estudante sira ne’ebé mai halo pratika aprendizajen kampu tamba ne’e orgullu ba imi hotu nia prezensa.

Nia akresenta ita atu tama iha desentralizasaun ita presiza rekursu, la’os de’it ba ema ne’ebé hetan diploma maibe presiza kapasidade intelektual oinsa atu dezenvolve Munisípiu sira iha área dezenvolvimentu nian.

“Imi mai iha fatin ida ne’e atu aplika matenek no koñesimentu ba iha komunidade, liga ho siensia ne’ebé imi aprende ona husi universidade, tamba ne’e imi núdar jerasaun kontinuador nasaun ida ne’e nian tenki aprende maka’as, nune’e ba futuru ba povu no nasaun”,dehan APA Nain Feto.

Nia husu ba Estudante sira tenki hatudu diferente ho ema seluk entre ema eskola ho la eskola iha komunidade nia leet, hanesan estudante universitariu tenki halo trasformasaun iha sosiedade no muda mentalidade komunidade nian.

Iha sorin seluk, Kordenador PAK Munisípiu Dili, José Manuel Maniquin, AP,Lic.Eng.,M.Eng. reforsa tan, programa PAK, Universidade hetan autorizasaun husi PAM-Dili ne’ebé liu husi despaisu, hodi hatutan ba iha Postu lima ne’ebé eziste iha Munisípiu Dili nian, programa PAK hahu tinan kotuk konsentra hotu iha Raeoa, no tinan ida ne’e ba iha teritoriu timor laran tomak.

“Tinan ida ne’e universidade haruka sira fila fali ba sira-nia moris fatin, atu moris hamutuk komunidade no ba iha sosiedade inklui joventude sira ne’ebé hola parte ba iha sira-nia hela fatin, nune’e bele sente katak ita moris hamutuk ho komunidade no sosiedade liu husi difikuldade oi-oin lahanesan ho sentral”,tenik Koredenador.

Kordenador mós husu ba estudante sira atu hatudu komportamentu ne’ebé di’ak no responsabilidade ho matenek, imi mai husi sosiedade akadémiku universidade da paz, tamba ne’e tun ba iha baze hodi identifika no inventarizasaun ba nesesidade baziku iha sosiedade liu husi siensia ne’ebé aprende ona iha universidade tuir ida-idak nian.

Entertantu Estudante 80 ne'e, simu husi Autoridade Posto Administrativo Nain Feto ho Estrutura Suku.