ESTUDANTE 192 IHA KAMPUZ UNPAZ RAMU OE-CUSSE RAEOA HAHU ONA PROSESSU APRENDISAJEN

ESTUDANTE 192 IHA KAMPUZ UNPAZ RAMU OE-CUSSE RAEOA HAHU ONA PROSESSU APRENDISAJEN

Dili-Universidade da Paz (UNPAZ) nia estudante atus ida sia nulu resin rua (192), hahú ona prosessu aprendisajen tinan akadémiku 2022 nian, iha Kampuz ramu UNPAZ Raeoa Oé-Cusse Santa Rosa (05/04).

Kordenadór Jeral Kampuz Ramu UNPAZ Raeoa Oé-Cusse, Sr. Lourenço Paixão da Rosa,S.Fil,MM. hateten, prosessu aprendisajen kampuz ramu UNPAZ Raeoa, ha’u sente, maske foin hahú buat hou-hotu prosessu kapas, tanbá ida ne’e atu hasa’e kapaside no dezenvolve Oé-Cusse oan.

Nia hatutan, husi aprendisajen ida ne’e, oinsa bele hametin tán kapasidade Oé-Cusse oan, hametin tán saida mak atu halo iha Oé-Cusse liuhusi programa ne’ebé mak UNPAZ implementa iha Oé-Cusse.

“Ami garantia UNPAZ Raeoa, buat hotu sei la’o di’ak, tanbá liuhusi UNPAZ ida ne’e, bele hasa’e tán saida mak durante ne’e Oé-Cusse oan sofre, liuliu bá funsionariu sira ne’ebé la iha kbi’it atu kontinua nia estudu, maibe UNPAZ ramu iha Oé-Cusse posibilidade bá sira hodi kontinua sira nia estudu”,tenik Kordenadór.

Iha fatin hanesan, Estudante Jumita Maria De Fatima Molo. husi Fakuldade Saúde Públika Departamentu Nutrisaun, ne’ebé reprezenta estudante sira katak, ha’u nu’udar estudante kampuz UNPAZ Raeoa, ha’u sente orgullu no kontente tebes, tanbá iha ona UNPAZ ramu iha Raeoa, nune’e bele hamenus ami nia viagen husi ne’e bá iha kapital.

“Orgullu bo’ot bá kampuz ramu UNPAZ Raeoa, bele hamenus osan trasporte nian husi inan aman, UNPAZ Raeoa, ha’u hakarak bá futuru, UNPAZ Raeoa bele avansa bá oin, no futuru UNPAZ Raeoa bele sai di’ak liu tán iha dezenvolvimentu”,dehan Estudante Maria.

Nia salienta, husu bá maluk sira ne’ebé mak seidauk kontinua nia estudu iha tinan kotuk, no labele ba iha kapital, bele hakat mai iha kampuz UNPAZ ramu Raeoa Oé-Cusse, ne’ebé besik liu ita.

Estudante, Paulo Ximenes da Costa, Fakuldade Enjeñaria, Departamentu Teknik Sivil, reforsa, agradese bá UNPAZ, ne’ebé bele hola inisiativa ida hodi loke ramu UNPAZ iha Raeoa Oé-Cusse.

“Rai ida ne’e presija tebes ita jerasaun foun nia kontribuisaun”,Nia haktuir.

Entretantu, total estudante hamutuk atus ida sia nunu resin rua (192), ne’ebé hahú ona prosessu aprendisajen iha kampuz ramu UNPAZ Raeoa Oé-Cusse, kompostu husi Fakuldade 6, Fakuldade Ekonomia, Direitu, Saúde Públika, Siénsia Sosiais Humaniora, Enjeñaria, Teknologia Agrikola.