![ESTRUTURA UNIVERSIDADE HALO REVIZAUN BA ESBOSU ESTATUTU UNPAZ](https://unpaz.tl/asset/foto_berita/143971443_435584984560126_6759994714245031775_o.jpg)
#UNPAZ# 03 FEVEREIRO 2021
ESTRUTURA UNIVERSIDADE HALO REVIZAUN BA ESBOSU ESTATUTU UNPAZ
Dili-Universidade da Paz (UNPAZ), liuhusi Fundasaun Neon Metin ho estrutura Universidade, halo revizaun ba esbosu estatutu UNPAZ nian, ne’ebé hakerek tiha ona iha tempu uluk, ohin estrutura tur hamutuk hodi halo diskusaun ba esbosu estatutu foun ne’ebé halo revizaun husi estatutu tuan, iha salaun Pos-Graduasaun (03/02).
Prezidente Fundasaun Neon Metin Sr. Ir. Jose da Costa Menezes, M. Food. Tech. hateten ohin ita atu halo lei ida ba konsulta públiku katak, bainhira lei ne’e ita produs hotu-hotu kompriende bele halo tuir, tanba produtu lei ida ne’e ita hotu nian, prosedementu légal ida ne’ebé tenki kumpri.
‘’Nia hatutan instituisaun ida tenki iha lei ida, hodi sai hanesan matadalan ne’ebé bele gia hotu-hotu iha Universidade, ita hotu kompri ba lei ne’e buat hotu lao di’ak’’, dehan prezidente Fundasaun Jose.
Iha parte seluk, Magnifiku Reitór Universidade da Paz, Dr. Adolmando Soares Amaral, Lic Eco. MM. dehan Universidade da Paz iha estatutu propriu ne’ebé hakerek desde 2004, maibe iha buat barak ne’ebé estatutu lao, ohin husi parte fundasaun no estrutura Universidade deskuti hamutuk ba esbosu estatutu refere.
‘’Ita buka atu kompriende bainhira ita halo estatutu ne’e, hatene uluk historia husi instituisaun ne’e nia prosesu ne’e halo nusa, para depois ita hakerek estatutu labele uza ita nia interse, maibe estatutu ida bele halo ema hotu-hotu kontente atu asegura instituisaun ida ne’e nia existensia iha futuru’’, dehan Reitór.
Partesipa iha revizaun esbosu estatutu ne’e, Magnifiku Reitór Universidade da Paz, Dr. Adolmando Soares Amaral, Lic Eco. MM. Prezidente Fundasaun Neon Metin, ho nia Estrutura, Pro Reitór, Dekanu Fakuldade Neen, Xefe Departamemtu, Diretór Unidade sira, Desente, inklui Funsionariu iha Universidade da Paz.