ESTAJIADUS SIRA SEI ESFORSU HODI FINALIZA MORU KAMPUS SANAK UNPAZ LIQUISA

ESTÁJIADUS SIRA SEI ESFORSU HODI FINALIZA MORU KAMPUS SANAK UNPAZ LIQUISA

Dili-Universidade da Paz (UNPAZ) nia estudante atus ualu lima nulu resin sia (859) ne’ebé kompostu husi grupu 1-20 ne’ebé hala’o programa estájiu sosial tinan akadémiku 2023, sira nafatin esforsu hodi hala’o sira nia servisu tuir ida-idak nia grupu, nune’e bele finaliza moru haleu kampus tuir data ne’ebé universidade fó sai ona, iha Kampus Sanak UNPAZ Liquisa (10/04).

Tuir informasaun husi, Estudante Elisio Freitas, ne’ebé reprezenta grupu 15, hateten ami nia servisu oras ne’e dadaun atinji ona 30%, lolo’os liu ona, maibe husi parte universidade deside ami tenki ba mai de’it, husi kampus sentral mai iha kampus sanak, tanba ne’e mak ami nia projetu la’o tarde, maibe ami nia servisu la’o normal hela.

“Ami nia ekipamentu no orsamentu mós sufisiente hela, bele responde ba atividfade ida ne’e, tanba ne’e ami la’o tuir de’it prosedimentu ne’ebé mak universidade haruka, tanba ne’e, hotu ka la hotu, ami tenki esforsu, atu bele finaliza atividade ida ne’e, maibe ami la promote semana ida ka rua hotu, tanba atvidade sei la’o hela, ami fiar katak sei bele finaliza tuir data ne’ebé mak determina ona”,dehan Estájiadu Elisio.

Iha fatin hanesan, Estudante Juvito X. Ornai, husi Grupu 17, hatutan ami nia servisu hanesan inisiu ami hela de’it iha ne’e, atividade la’o normal, maibe iha desizaun husi parte universidade nia deside, ami tenki fila ba kampus sentral, depois dader-dader mak desloka mai iha kampus sanak Liquisa, ho ida ne’e mak, oras ne’e dadaun ami nia atividade la’o atraza ituan, tanba haree mós ba kondisaun sira hotu, ho ida ne’e husu ba parte universidade nafatrin toma responsabilidade ba ami estudante sira.

“Ami nafatin dignifika ami nia an ba universidade no servisu ho disiplina, onestu, homilidade no pasiensia ba servisu ida ne’e, tanba ami nia hakark mak, tenki remata ami nia servisu ida ne’e”,tenik Estudante Juvito.

Sorin seluk, Estudante Julio Salsinha, husi Grupu 17, esplika ami nia servisu la’o di’ak, maibe iha atrazu ituan, tanba husi kampus sentral mak mai iha kampus sanak Liquisa, ho ida ne’e mak bazeia ba kondisaun sira hotu, oras ne’e dadaun ami nia atrividade la’o hela hanesan ita hotu haree ne’e.

“Ami nia grupu membru sira partisipa masimu, maibe iha estensia na’in rua mak partisipa de’it sesta ho sabadu, kona-ba ami nia grupu ativu hotu, ho ida ne’e mak ami servisu foin mak atinji 30%. Maibe ami nafatin kolabora ho ami nia grupu, nune’e bele aselera servisu ida ne’e lalais, nune’e to’o data 27 bele finaliza atividade ida ne’e”,Katak Estudante Julio.