![EKIPA HUSI BSN, WHO NO CVTL HALO SOSIALIZASAUN DOASAUN RAN IHA UNPAZ](https://unpaz.tl/asset/foto_berita/146.jpg)
EKIPA HUSI BSN, WHO NO CVTL HALO SOSIALIZASAUN DOASAUN RAN IHA UNPAZ
Dili-Universidade da Paz (UNPAZ) liuhusi Fakuldade Saúde Públika e Ciênsia Medica (FSPeCM-UNPAZ) ne’ebé kolabora hamutuk ho Banco Nacional de Sangue (BNS), World Health Organizational (WHO) no Cruz Vermelha de Timor-Leste (CVTL) hodi sosializa informasaun kona-ba doasaun ran ba estudante sira, relasiona ho selebrasaun dies natalis UNPAZ ba dala XIX tinan akadémiku 2023, iha Salaun José Kasimiru (27/02).
Doutora, Adelina Ranguel Martins, nu’udar Blood Moblization, hateten ohin ita hamutuk iha fatin ida ne’e, atu sosializa informasaun kona-ba importansia husi doasaun ran, ba estudante ka komunidade ba ema hotu-hotu, oinsa mak atu bele oferese ran voluntariamente, hodi bele ajuda ita nia familia ka komunidade ne’ebé husu tulun ita atu apoiu ran.
Iha fatin hanesan, Xefe Laboratorium FSPeCM-UNPAZ, Sr. Cesaltino Maria Pires, Lic.Sp.,M.Sp, informa, atividade sosializasaun dosaun ran ida ne’e, importante tebes, tanba ita haree ba siatuasaun reál ne’ebé mak akontese iha timor-leste, ita nia komunidade barak mak presiza duni ita nia ran.
“Tanba ne’e mak, ita kopera oinsa aijuda mós governu liuhusi ita nia konsiensia atu bele oferese ita nia kontribuisaun liuhusi ran, hodi bele tulun iha nia familia nomós komunidade sira ne’ebé presiza ran”,dehan Xefe Laboratorium.
Nia hatutan, atividade sosializasaun ba doasaun ran ida ne’e, ita prepara ba selebrasaun dies natis UNPAZ ne’ebé sei selebra iha dia 09 de Marsu 2023, atividade doasaun ran sei realiza iha dia 04 Marsu 2023.
Agradese ba ekipa ne’ebé husik ona tempu, ohin bele mai fahe ona informasaun pozitivu tebes ba estudante sira, espera katak ho informasaun sira ne’e la hela de’it iha ne’e, maibe nafatin habelar ba iha sosiedade, nomós estrudante sira hotu iha UNPAZ.
Entretantu, doasaun ran sei realiza iha dia 04 Marsu 2023, tanba ne’e ba studante sira hotu ne’ebé atu partisipa iha doasaun ran ida ne’e, hahú ohin bele hakat ba halo resjistrasaun iha laboratorium (FSPeCM-UNPAZ).
Partisipa iha sosializasaun ne’e, ekipa husi, Banco Nacional de Sangue (BSN), World Health Organizational (WHO) no Cruz Vermelha de Timor-Leste (CVTL), Xefe Laboratorium Sr. Cesaltino Maria Pires, Lic.Sp.,M.Sp. nomós sivitas akadémiku Universidade da Paz.