EKIPA AVALIADOR HUSI ANAAA HALO AVALIASAUN BA PROGRAMA MESTRADU 3

Dili-Universidade da Paz (UNPAZ), liuhusi ekipa ANAAA halo avaliasaun ba programa Mestradu tolu (3), hanesan Siénsia de Direitu, Administrasaun Públika no Saúde Públika ne’ebé atu hetan akreditasaun iha tinan ida ne’e, iha Aula Prof.Dr.Lucas da Costa (08/09).

Magnifiku Reitór Universidade da Paz, Dr. Adolmando Soares Amaral, Lic, Eco. MM. hateten tinan ida ne’e UNPAZ lori programa estudu haat, ida iha nivel lisensiatura, nomós tolu iha nivel Mestradu ba akreditasaun, ita hotu iha UNPAZ, ita mai ho komitmentu ida atu asesgura obra ne’ebé Saudozu husik hela ba ita, buat hotu ne’ebé iha ona, ita buka atu hadia para garante nia kualidade, atu garante nia kualidade mak tenki tuir nia prosesu sira husi ANAAA mak ita tenki lori programa estudu sira ne’ebé iha ba akreditasaun.

"Ita hahú husi 2004 ho Fakuldade neen no programa estudu sanulu resin ida (11), no to’o ohin loron 2021 iha nivel lisensiatura ita iha programa estudu rua nulu (20), no iha nivel Mestradu ita iha programa estudu hitu (7),husi programa hitu (7), ne’e hetan ona lisensia operasionais, ba tinan ida ne’e ita lori uluk tolu ba kompete ba akreditasaun, espera iha tempu sira tuir mai sira seluk ita sei lori tán ba akreditasaun", haktuir Reitór

Prezidente Fundasaun Neon Metin, Ir. José Menezes, Agradese ba ekipa ANAAA ne’ebé mai halo avaliasaun ba programatiku iha UNPAZ, maske iha tempu pandemia covid-19, maibe ekipa ANAAA esforsu nafatin hala’o buat ki’ik oan balun, maibe impaktu bo’ot ita bele halo.

Aliende ne’e, Diretór Exekutivu ANAAA, Sr. Edmundo Viegas, hato’o agradesementu wain ba dispozisaun di’ak estrutura UNPAZ tomak, ami hahú halo avaliasaun programatiku ne’e hahú husi 2016, maibe ohin 2021 depoi de tinan lima resin, pela primeiraves ami avalia kursu Mestradu ba Siénia de Direitu, ida ne’e hanesan esperiensia primeiru ba ANAAA atu avalia kursu Mestradu.

Partesipa iha avaliasaun programatiku ne’e, Magnifiku Reitór Universidade da Paz, Dr. Adolmando Soares Amaral, Lic, Eco. MM. ho estrutura, Pro-Reitóres, Dekanu Fakuldade Neen, Diretór Exekutivu ANAAA, Sr. Edmundo Viegas, ho ekipa avaliador sira.