EKIPA AVALIADOR ANAAA HALO AVALIASAUN BA PROGRAMA MESTRADU SIENSIA SAUDE PUBLIKA

#UNPAZ# 20 SETEMBRU 2021

EKIPA AVALIADOR ANAAA HALO AVALIASAUN BA PROGRAMA MESTRADU SIÉNSIA SAÚDE PÚBLIKA

Dili-Universidade da Paz (UNPAZ), liuhusi ekipa ANAAA halo avaliasaun ba programa Mestradu Siénsia Saúde Públika ne’ebé atu hakat ba iha akreditasaun iha tinan ida ne’e, iha Aula Prof. Dr. Lucas da Costa (20/09).

Magnifiku Reitór Universidade da Paz, Dr. Adolmando Soares Amaral, Lic, Eco. MM, hateten akreditasaun ba programatika ita hahú desde 2016, iha tempu ne’ebá Universidade da Paz iha programa de estudu sanulu resin ida (11), ne’ebé lori ba partesipa iha akreditasaun ba programatika.

Ohin loron 2021 programa de setudu iha UNPAZ, iha nível Lisensiatura rua nulu (20), Mestradu hitu (7), neen (6) hetan ona lisensia operasionais no ida (1) iha hela prosesu, tinan ida ne’e ita lori programa tolu (3) husi Mestradu ba partesipa akreditasaun, Siénsia de Direitu, Siénsia Administrasaun Públika, no Siénsia Saúde Públika, tenik Nia.

"UNPAZ ita nafatin kopera ho governu liu-liu husi ANAAA, avaliasaun mak ita bele hatene frakeza sira, para depois ita organiza a’an atu la’o di’ak liu iha tempu sira tuir mai, avaliasaun la’os ema atu mai julga ita, maibe avaliasaun avaliador sira atu ajuda ita fó hanoin ita para ita organiza a’an hanesan ensinu superior ida ne’ebé hala’o nia atividade akadémiku ho di’ak, ikus mai bele produz rekursus umanus ne’ebé ho kualidade para bele ajuda reduz problema ba governu no estadu iha rai ida ne’e",haktuir Reitór.

Agradese ba avaliador sira tantu nasionál no internasionál, no agradese ba Dr. Edmundo Viegas, ne’ebé durante ne’e servisu makas lo’os ajuda ensinu superior sira iha prosesu avaliasaun ba hetan Lisensiatura nomós akreditasaun ba Lisensia operasionais no akreditasaun programatika sira, Nia Salienta.

Diretor Exekutivu ANAAA, Dr. Edmundo Viegas, hatutan vizita avaliasaun ida ne’e, hanesan parte daruak husi avaliasaun tomak, avaliasaun ba akreditasaun programatika estudu ne’ebé ANAAA hala’o ne’e, bazeia ba dokumentu ida ne’ebé hanaran relatoriu auto avaliasaun, ne’ebé nia formatu ANAAA mak estabelese hodi fahe ba universidade sira, avaliasaun ne’e atu kompleta informasaun dadus ruma ne’ebé seidauk kompletu liu-liu iha dokumentu anexu balun ne’ebé universidade iha.

"Video ne’e rekizitu ida ne’ebé ami husu, liu-liu tanba situasaun pandemia avaliador internasionál labele mai, video ne’e ajuda avaliador internasionál para iha vizaun ruma haree kona-ba realidade sira, video kualidade kapas, ida ne’e rekezitu ANAAA nian duni, para kursu hotu-hotu tenki submete video ho durasaun badak ida, para atu hatudu prosesu akadémiku ne’ebé importante infraistrutura ne’ebé ita bele konsidera rekursu ida apoiu ba prosesu hanorin no aprende",dehan Dr. Edmundo.

Partesipa iha avaliasaun programatiku ne’e, Magnifiku Reitór Universidade da Paz, Dr. Adolmando Soares Amaral, Lic, Eco. MM. ho estrutura, Pro-Reitóres, Dekanu Fakuldade Neen, Diretór Exekutivu ANAAA, Sr. Edmundo Viegas, ho ekipa avaliador sira.