EKIPA AVALIADOR ANAAA HALO AVALIASAUN BA PROGRAMA MESTRADU SIENSIA ADMINISTRASAUN PUBLIKA

#UNPAZ# 10 SETEMBRU 2021

EKIPA AVALIADÓR ANAAA HALO AVALIASAUN BA PROGRAMA MESTRADU SIÉNSIA ADMINISTRASAUN PÚBLIKA

Dili-Universidade da Paz (UNPAZ), Liuhusi ekipa ANAAA halo avaliasaun ba programa Mestradu ba Siénsia Administrasaun Públika ne’ebé atu hakat ba akreditasaun iha tinan ida ne’e, iha Aula Prof. Dr. Lucas da Costa (10/09).

Magnifiku Reitór,Universidade da Paz, Dr. Adolmando Soares Amaral, Lic, Eco. MM, hateten ita sira ne’ebé organiza atividade iha ensinu superiór, ita hakarak atu garante kualidade ba rekursus humanus, para rekursus humanus ne’ebé ita produz atu aijuda governu no estadu, ida ne’e mak ita nia objetivu lolo’os.

"Ita produz rekursus humanus para kontribui atu hamenus problema ba governu no estadu, para atu bele dezenvolve nafatin ita nia nasaun ba oin, ida ne’e mak programa estudu sira ne’ebé ita lori ba partesipa iha prosesu akreditasaun", dehan Reitór.

Nia hatutan iha 2004 ita hahú programa estudu sanulu resin ida (11), iha nivel Lisensiatura, no ohin loron 2021, ita iha programa estudu nivel Lisensiatura atinji rua nulu (20), no iha nivel Mestradu ita iha programa estudu hitu (7), nomós iha programa ida ba Doutoramentu ida (1) ne’e progresu ne’ebé ita iha.

Prezidente Fundasaun Neon Metin, Ir. José Menezes, Tec, Food, hatutan ohin ita hakat ba avaliasaun loron datoluk ita iha ekipa foun, ekipa rua ne’ebé liu ba ne’e, avalia ba iha programa Siénsia de Direitu nian, kontente tanba ita bele hala’o ita nia atividade, maske iha situasaun covid-19 nia laran.

Reprezenta Diretór Exekutivu ANAAA, Sr. Hipolito da Cruz, salienta prosesu avaliasaun ida ne’e la’os, prosesu ida ita atu buka ita nia sala, atu identifika sala ne’ebé programa ne’e iha, maibe prosesu ne’e hanesan fatin atu reviu katak, ita avalia malu para identifika frakeza saida mak ita ida-idak iha, forsa saida no kbi’it saida mak husi programa estudu ne’e iha, para ba oin frakeza sira ne’e ita be’e hadia di’ak liu tán ba futuru.  

Partesipa iha avaliasaun programatiku ne’e, Magnifiku Reitór,Universidade da Paz, Dr. Adolmando Soares Amaral, Lic, Eco. MM, ho estrutura Proreitores, Dekanu Fakuldade Neen, Reprezenta Diretór Exekutivu ANAAA, Sr. Hipolito da Cruz,ho ekipa avaliador sira.