EKIPA AVALIADOR ANAAA HALO AVALIASAUN BA DEPARTAMENTU KONSTRUSAUN SIVIL

#UNPAZ# 24 SETEMBRU 2021

EKIPA AVALIADOR ANAAA HALO AVALIASAUN BA DEPARTAMENTU KONSTRUSAUN SIVIL

Dili-Universidade da Paz (UNPAZ), liuhusi ekipa ANAAA halo avaliasaun ba iha Fakuldade Enjenaria nia Departamentu Kostrusaun Sivil ba programa lisensiatura nian, ne’ebé atu hakat ba iha akreditasaun iha tinan ida ne’e, iha Aula Prof. Dr. Lucas da Costa (24/09).

Magnifiku Reitór Universidade da Paz, Dr. Adolmando Soares Amaral, Lic, Eco. MM, hateten avaliador sira sei la mai julga ita, ko’alia buat ne’ebé ita hakerek ona no hatan buat ne’ebé ita halo, hodi hein komentariu husi avaliador sira nomós rekomendasaun sira, iha tempu tuir mai ita bele organiza a’an programa estudu ida ne’e mós bele sai alternativa ida hodi bele hamenus no ajuda governu ba problema iha rai ida ne’e, ligadu ho ita bo’ot sira nia siénsia ne’ebé aprende.

"Avaliador sira sei la mai buka ita nia sala, maibe sira mai aijuda ita atu hadia tán buat sira ne’e iha tempu tuir mai atu di’ak liu tán, ita agradese tanba sira investe sira nia tempu durante loron rua iha ne’e ho matenek ne’ebé sira iha, ba buat ne’ebé ita hakerek ona ita sei ko’alia no ita sei hatan ba buat sira ne’ebé ita halo ona", tenik Reitór.

Nia hatutan buat ruma ne’ebé ita sei dauk hakerek, ita hein sira nia rekomendasaun no buat ruma ne’ebé ita halo, maibe la tuir sira nia hakarak no padraun ne’ebé iha, prontu ita hein sira nia rekomendasaun, para depois reakreditasaun iha tempu sira tuir mai, UNPAZ liu-liu Fakuldade Enjeñaria nia Departamentu konstrusaun sivil bele organiza a’an di’ak liu tán.

"Ita nia objetivu hamosu programa estudu sira ne’e la’os ita buka atu halo kompetisaun ho programa estudu iha universidade sira seluk lae, ita hotu nia hanoin objetivu mak programa estudu sira ne’e mosu atu prepara rekursus humanus ida ne’ebé ho kualifikadu bele hatan ba ita nia situasaun balun iha ne’e, nomós bele kontribui atu resolve problema ba governu no estadu iha rai ida ne’e", Reitór hatutan.

Reprezenta Diretór Exekutivu ANAAA, Sr. Hipolito da Cruz, agradese ba apoiu tomak ne’ebé UNPAZ fó ba avaliasaun ida ne’e, avaliasaun ida ne’e ba datoluk , ne’ebé ami ho ekipa panel sira mai vizita UNPAZ hansan bai-bain.

"ANAAA mós orgullu ho apoiu tomak ne’ebé UNPAZ fó, la hanesan ho instituisaun sira seluk ne’ebé ami ba hasoru de’it mak iha programa ida ne’e, maibe husi UNPAZ nian ami sente katak la’os programa ida de’it mak atu hasoru, maibe programa hotu-hotu apoiu malu katak servisu kolaborativu ne’ebé lolo’os ne’e hanesan valor ida ba garante kualidade nian ne’ebé ami haree", haktuir Sr. Hipolito.

Nia hatutan, atu hato’o de’it Diretor Exekutivu ANAAA Dr. Edmundo Viegas nia mensajen katak, iha prosesu avaliasaun hensan bai-bain, la’os prosesu ida ne’ebé atu mai ho panel sira atu buka sala sira husi programa ida ne’e, maibe prosesu ida ne’e hanesan prosesu ida, para ita ajuda malu hodi reviu buat ne’ebé maluk sira halo hato’o mai maluk seluk para haree parte ne’ebé identifika di’ak ona, no parte ne’ebé persija ba oin ne’e atu hadia, ida ne’e mak valor husi prosesu reviu nian.

Partesipa iha avaliasaun programa Lisensiatura ne’e, Magnifiku Reitór,Universidade da Paz, Dr. Adolmando Soares Amaral, Lic, Eco. MM, ho estrutura, Reprezenta Diretór Exekutivu ANAAA, Sr. Hipolito da Cruz, ho ekipa avaliador sira, Reprezenta Prezidente Fundasaun Neon Metin, Ir. Hugu JM de Carvalho, Arch, Proreitores Dekanu sira, Diretóres Unidade sira hotu, Xefe Departamentu sira, korpus Dosente, Funsionariu, inklui Estudante.