DIRETOR UNPAZ RAMU COVALIMA HATO\'O PROGRESU PREZENSA UNPAZ BA PAM COVALIMA

DIRETOR UNPAZ RAMU COVALIMA HATO'O PROGRESU PREZENSA UNPAZ BA PAM COVALIMA

Covalima-05-04-2024 Universidade da Paz (UNPAZ) liuhusi Diretor UNPAZ Ramu Covalima, Sr. Silvester Ferreira, Lic. Eco.,MM. akompaña husi Funsionariu Administrasaun, Sr. Carlos dos Santos, Lic. SP. halo audensia ho Prezidente Autoridade Munisípiu Covalima (PAM), Sr. Miguel Armada Cardoso, Lic. Eco. hodi hato'o Progresu UNPAZ Ramu Covalima hahú husi 2007-2024.

Prezidente Autoridade Munisípiu Covalima (PAM), Sr. Miguel Armada Cardoso, Lic. Eco, hateten hanesan PAM Covalima ita observa ona katak edukasaun ne'e importante los, ho ida ne'e prezensa UNPAZ iha Covalima hodi dezenvolve edukasaun ne'ebé di'ak liu iha Covalima nomós produs matenek iha Covalima, hodi haree mós ba rai ida ne'e, hanesan PAM Covalima sei apoiu no fó fiar ba UNPAZ Covalima hodi dezenvolve edukasaun.

"Oan sira ba kontinua estudu iha Dili bele hasoru situasaun di'ak nomós la di'ak, tanba haree ba mós rendimentu inan aman nian, tanba ne'e ha'u fiar prezensa UNPAZ iha Covalima hanesan mós UNPAZ sentrál, tanba dosente mesak kualidade mak hanorin, tantu dosente nasionál nomós dosente iha Munisípiu",dehan PAM Covalima.

PAM enkoraja ba komunidade Munisípiu Covalima katak, UNPAZ mai hakbesik ona iha Munisípiu Covalima, ho ida ne'e inan aman sira ho hanoin ne'ebé mak di'ak ba oan sira-nia futuru, atu haruka oan sira bele kontinua estudu iha nivel ensinu superior UNPAZ ne'ebé iha ona Munisípiu Covalima.

Iha fatin hanesan, Diretor UNPAZ Ramu Covalima, Sr. Silvester Ferreira, Lic. Eco.,MM, hatutan objetivu mai hasoru PAM Covalima, hakarak mai hato'o parabens PAM Covalima, ne'ebé hetan fiar husi líderansa sentrál, nomós reprezenta estrutura UNPAZ sentrál nomós Covalima, hakarak to'o mós progresu UNPAZ nian iha Covalima hahú husi 2007-2024 nomós Estudu Viabilidade ba Planu Master Plan Kampus Ramu Covalima.