DIRETOR ATUAL PATRIMONIU GARANTE SEI HALAO SERVISU HO RESPONSABILIDADE

DIRETÓR ATUÁL PATRIMÓNIU GARANTE SEI HALA’O SERVISU HO RESPONSABILIDADE

Universidade da Paz (UNPAZ), Liuhusi Diretór Sesante Patrimóniu entrega mandatu servisu ba Diretór atuál, ho objetivu tanbá diretór sesante hetan konfiánsa husi universidade hodi hala’o kna’ar hanesan Diretór Koordenador Assuntu Kampus B Liquisa nian, iha Kna’ar Fatin Património (26/06).

Diretór Koordenadór Assuntu Kampus B Liquisa, Sr. Lucas Pereira, Lic.Eco.,MM, esplika entrega podér patrimóniu ne’e hanesan responsabilidade husi sesante ba atuál atu hala’o responsabilidade tuir mata-dalan ne’ebé mak iha.

“Hanesan responsabilidade oinsá mak diretór sesante entrega relatóriu servisu durante ne’e iha ba diretór foun hodi bele hala’o servisu tuir mata-dalan ne’ebé mak iha, liu-liu hala’o servisu sira ne’ebé iha ona hodi kontinua nafatin, oinsá iha relasaun ne’ebé di’ak ho funsionáriu sira, nune’e bele halo jestaun di’ak ba patrimóniu iha universidade,” tenik Sr. Lucas.

Diretór Koordenador Assuntu Kampus B Liquisa ne’e afirma, mandatu foun ne’ebé iha sai mós responsabilidade bo’ot iha kampus B, tanbá iha parte ida diretór no sai mós koordenadór husi direje no koordena jestaun servisu sira ne’ebé iha liu-liu koordena unidade ha’at ne’ebé tutela iha kampus B mak hanesan servisu seguránsa, Cleaner, Logistika no patrimóniu.

Diretór atuál Sr. Anastásio Soares, Lic.Dir., M.Dir., informa mandatu foun ne’ebé iha nu’udar fiar husi esturtura universidade hodi hala’o servisu ho responsabilidade.

“Mandatu foun ne’e nu’udar responsabilidade, la’os previléjiu ida ba ita, maibé responsabilidade ida ne’ebé mak estrutura universidade fó fiar, atu servisu ho responsabilidade hodi fó kontinuidade ba servisu ne’ebé mak diretór sesante hala’o ona no servisu sira ne’ebé mak seidauk finaliza. Fiar katak ho mudansa estrutura, ita bele kompleta no bele kontribui ba servisu sira ne’ebé akontese iha futuru,” dehan Dir.Património.

Diretór atuál ne’e mós garante katak sei hala’o servisu ho responsabilidade no sei kontinua lori atividade sira ne’ebé liga ba servisu patrimóniu nian.

Partisipa iha entrega mandatu ne’e, Diretór Koordenadór Assuntu Kampus B Liquisa, Sr. Lucas Pereira, Lic.Eco.,MM. Diretór atuál Sr. Anastásio Soares, Lic.Dir., M.Dir. akompaña husi funsionariu sira.