ANAAA FINALIZA ONA AVALIASAUN BA PROGRAMATIKA BANKARIA

ANAAA FINALIZA ONA AVALIASAUN BA PROGRAMATIKA BANKARIA

Dili-Universidade da Paz (UNPAZ) Liuhusi Agência Nacional Para a AValiação e Acreditação Académica (ANAAA.l.P), remata ona avaliasaun ba Programátika Bankária Fakuldade Ekonomia ne’ebé hala’o durante loron rua, Iha Aula Prof. Dr. Lucas da Costa (03/08).

Dr. Apolinario Magno, nu’udar Avaliadór husi ANAAA ne’e informa, avaliasaun ne’e atu haree fila-fali progresu ne’ebé mak universidade ne’e iha depois de Bankaria hetan valor C iha tinan lima liubá no rezultadu prelimináriu ne’ebé hatudu katak iha prosesu ne’ebé diferente ho tinan 2018.

“Avaliasaun ida ne’e kada tinan lima ita halo ba universidade sira ita halo modelu rua, ida ba institusionál no ida mak ita avaliasaun ba programa, ida ne’e ita halo avaliasaun ba programátika, ne’ebé monu ba programa estudu bankária nian. Iha tinan 2018 ita halo ona avaliasaun maibé hetan valor C. Nune’e, agora ita mai fali halo avaliasaun atu haree fila-fali ninia progresu sira no relatóriu ba rezultadu prelimináriu hatudu momo’os katak iha progresu barak lo’os ne’ebé mak universidade ne’e halo, espera bele hetan valór ne’ebé di’ak liután ba fulan rua depois fó sai nia rezultadu,”,tenik Dr. Apolinario.

Avaliadór ne’e afirma, hanesan mós ema akadémika ida fó apresiasaun tebes ba progresu ne’ebé mak universidade ne’e halo no hanesan avaliadór nia haree, progresu ne’ebé kompara ho relatóriu halo iha tinan lima liubá ne’e iha nia progresu ne’ebé mak signifikativu tebes.

Iha fatin hanesan, Prezidente Conselho Administrasaun Fundasaun Neon Metin Eng. José Menezes, M.FoodTech, haktuir avaliasaun husi ANAAA rezultadu indikadór 10 ne’e di’ak tebtebes, iha balun de’it mak minor maibé maiória di’ak ita iha melhoramentu di’ak tebes kompara ho tinan 2018. Tanbá bankária agora ne’e halo reakreditasaun katak, haree fila fali rezultadu husi 2018, sira nota katak ita iha melhoramentu barak husi programa estudu bankaria. Ita ho esperansa bo’ot, husi noasaun sira ne’ebé ohin aprezenta, espera ba tinan ne’e ita iha rezultadu ne’ebé di’ak tebes.

Entretantu iha avaliasaun departamentu bankaria ne'e, Avaliadór Internasionál, Prof. Dr. Maniam Kaliannan (Team Leader) Avaliador nasionál, Sr. Hugu Metodio dos Santos Gago. Dr. Apolinário Magno.

Partisipa iha avaliasaun programátiku ne'e, Magnífiku Reitór Universidade da Paz, Dr. Adolmando Soares Amaral, Lic. Eco.,MM. Prezidente Conselho Administrasaun Fundasaun Neon Metin Eng. José Menezes, M.FoodTech., Estrutura Universidade ne'ebé kompostu husi Vise Reitores sira, Dakanu, Vise dekanu sira, Xefe Departamentu, Pro-Reitores nomós Dosentes, Funsionáriu inklui Alumi sira.