AKREDITASAUN AVALIASAUN PROGRAMATIKU ESTUDU EMPRENDEDORISMU IHA UNPAZ

AKREDITASAUN AVALIASAUN PROGRAMATIKU ESTUDU EMPRENDEDORISMU IHA UNPAZ

Dili-Universidade da Paz (UNPAZ), nia estrutura tomak partisipa iha aprzentasaun rezultadu ikus ba prosesu akreditasaun avaliasaun programatiku estudu emprendedorismu husi avaliador na’in tolu ne’ebé hala’o durante loron rua, iha Aula Prof. Dr. Lucas da Costa (27/07).

Magnífiku Reitór Universidade da Paz, Dr. Adolmando Soares Amaral, Lic.Eco., MM. Esplika maioria husi estandar ne’ebé avaliador sira mai halo avaliasaun ne’e, sira-nia komentariu pozitivu tebes, maibe iha buat ida ka rua ita tenki rekoñese, tanba Stakeholder nomós ita nia antigu alunus sira ne’ebé gradua tiha ona, sira fó hanoin tan kona-ba materia sira ne’ebé introdus iha programa estudu ne’e ba oin, materia sira ne’e tenki iha pratika barak labele teoria de’it.

“Rekomendasaun sira, prontu ita konsidera hanoin sira ne’e, tanba dadauk ne’e departamentu emprendedorismu ne’e foun, foin mak inventariza Stakeholder sira iha timor ita rasik mak hahu. Ba futuru ita sei instala laboratorium, atu nune’e estudante sira apriende teoria, bele mós pratika, maibe 78% avaliador sira aprezenta ohin pozitivu”,dehan Reitór UNPAZ.

Iha fatin hanesan, avaliador nasionál, Sr. Jonio Julio da Costa Soares, akresenta prosesu tomak ne’ebé ami hala’o durante loron rua iha UNPAZ, ami tuir ANAAA nia padraun sira hotu, tanba ne’e iha loron primeiru haree uluk dokumentus sira hotu ne’ebé mak hatama mai husi ANAAA nia formatu, tanba ne’e ami avalia bazeia ba dokumentu sira ne’ebé mak iha.

“Husi buat sira ne’e hotu durante loron rua ami verifika, bazeia ba faktus sira ne’ebé UNPAZ tau iha relatoriu ne’e hanesan ho iha kampu realizade, tanba ne’e iha loron primeiru ami hasoru malu ho fundasaun, magnifiku reitor, stakeholder, dosente, estudante nomós ikus liu mak ami vizita fatin universidade nian kona-ba hodi haree fasilidade sira, iha loron ohin ami konfirma dokumentu nomós enkontru adisioanl hodi kompleta relatoriu, ikus liu mak aprezenta ba iha universidade hodi haree hamutuk, konkorda ho rezultadu rekomendasaun sira ne’e, hodi asina hamutuk.

Nia dehan rezultadu husi avaliasaun progranmatiku emprendedorismu ne’e, sei rona rezultadu husi ANAAA, hanesan asesor ami halo relatoriu hotu hatama ba ANAAA, rezultadu saida de’it mak iha, sei halo moderasaun husi ANAAA mak sei haree buat ruma presiza konfirma ho universidade, ami nafatin servisu hamutuk.

Entretantu iha avaliasaun akreditasaun programátiku Emprendedorismu ne'e: Painelista internasionál, Prof. Dr. Maniam Kaliannan nomós painelista nasionál Dr. Helio A. da Costa Xaver Mau Quei no Sr. Jonio Julio da Costa Soares, ho ekipa sira.

Partisipa avaliasaun akreditasaun programátiku ne’e, Magnífiku Reitór Universidade da Paz, Dr. Adolmando Soares Amaral, Lic.Eco.,MM. Prezidente Konsellu Administrasaun Fundasaun Neon Metin. Vise-reitores, Pro-reitor, Dekanu sira, Xefe Departamentu sira, Diretór/a Unidade sira, Dosentes, Funsionariu.